2017年3月31日 星期五

lake tekapo ‧ 新西蘭 南島


終於坐定定出新西蘭遊記喇,
其實係舊年 11 月嘅事黎,
同老闆一年一度嘅長旅行今次揀左新西蘭南島,
(還是喜歡大自然景色 :p)
為左令老闆難得嘅假期唔想佢用腦,
我地揀左 join local tour,
11天裡令佢眼睛同腦袋都可以放空一下 :)

一切準備就緒等 17號上機,
不幸地13日晚南島發生地震,
最後幸好今次損壞冇2011年的厲害,
加上地震災區我地條路線係唔會去嘅...

所以,17號如期出發嚕 ^^
先飛去北島奧克蘭,繼而再轉機去基督城,
到達後 local tour 個代表已經响機場接我地,
正式開始我地期待左好耐嘅旅程 ^^


都係嗰句: 老規矩,唔資訊性架,希望相片搭夠 ^O^
一到埗我地只响市內遊覽,
呢座教堂响 2011 年地震時損毀得不少,
見佢仍進行緊復建


經過通宵機再轉內陸機,基本上個人都攰攰地,
當晚好早食晚飯跟住就返旅館休息 zzzzzz

第二日我地向 lake takepo 出發,yeah )))))

途中嘅景色,好舒服


週圍都係佢地 ^^


到左 lake tekapo 喇,
領隊帶我地响山丘上望吓個靚湖景先,
我同老闆買左杯咖啡坐响樹望住呢個景呆左好耐 XD


跟住向湖邊進發嚕


呢間係一間小教堂,
當日咁啱有一對新人响樹行禮


繼續湖邊閒逛


魯冰花季節




晚飯後領隊知道我同老闆好想影星星,
特別安排左夜探一個神袐地方,
一個黑到咩都見唔到嘅小山上,
當晚山上好大風,但到達後抬頭望個天,
痴線架,成個天都係星星,嗰種感覺係好幸福架, 
(唔知點解幸福架,係直覺囉)

肉眼都睇到銀河喎
(不過請原諒,實在大風到個腳架搖搖擺)
張相係矇左啲,但現場好清好亮架 ^^


雖然我地好想再影多啲,
但都唔忍心領隊陪我地一齊食風挨凍,
所以逗留左半個鐘就返旅館

返到旅館老闆唔夠喉繼續响旅館門前再影影影,
雖然呢邊望唔到銀河,但心足矣!



今次我地 join 嘅係一間台灣人開嘅專玩新西蘭南島嘅旅行團,
我地喜歡佢地專攻南島,唔係大團,
每團人數最多都係11個人 (包括領隊),
食嘅只包早餐,午同晚飯自己搞掂 (唔使一定食團餐仲好啦),
住方面更係我地最喜歡嘅,
除左頭尾晚之外,
其餘晚晚都係住湖邊獨立別墅,好靚,空間非常大 ^^
但需則頭尾晚係住汽車旅館,
但佢地安排嘅全部都好乾淨,如果有分等級嘅,
我相信係高級嗰種

另外,因為唔係大公司,
主持人加 3個領隊 (都係年輕人),
佢地都係响當地長大或讀書,
所以對當地相當熟識,
亦因為咁佢地帶我地去嘅地方唔多旅行團去嘅,
停留嘅時間絶對足夠我地週圍影相,
感覺就係自由行但唔使自己駕駛,
一個字,正!

- 續 -

2017年3月15日 星期三

班蘭戚風蛋糕


成人見人整班蘭蛋糕,心思思又想試下,
今日問老闆想唔想食,
佢話好喎...

收到 order 即去街市專賣泰國野嘅小店買左兩札班蘭葉,
然後加牛奶同椰奶打爛,隔渣留汁,
留番平時做戚風嘅份量

一路整嘅過程都好香...


純天然嘅顏色 ^^
好香好軟,個人認為好味過星加坡出名嘅手信 :p


成日冇出街,見又齊料,
再焗多一盤餐包做早餐


今次係 12 格,成盤變哂矮仔 > <


呢幾日天氣唔知想點,
天陰,大風,毛毛雨,潮濕...咩都齊...
搞到行唔到山  > <"

天氣快啲好啲啦,please......

2017年3月4日 星期六

榕樹灣 ~ 菱角山 ~ 索罟灣


上星期見天文台話前幾日會好好天,
所以一早約定好友去行個山,
舒展下筋骨 :)

以往對南丫島啲行山路徑有誤解,
以為只係得一條由榕樹灣去索罟灣嘅路線,
感覺沒甚麼特別,始終唔响選擇內,
好彩最近留意左啲行山友嘅面書,
原來南丫島都有山可攻頂,
做左功課,唔難行,
又相對安全 (始終得幾個女人麻)...


呢日响中環搭 12:00 船,
入到榕樹灣仲要 hea 食左個 light lunch,
然後施施然起步...


初段都係平路,過左洪聖爺灣開始上山,
終於出到啲汗 ^^
呢樹有個 "加油站",
大多數人都會响樹抖抖再起行,
呢日天朗氣清,可惜始終都有少少煙霞 ...


好快就行到去索罟灣


我地就响索罟灣嘅天后宫右側再上山,
因我地今日目的地係菱角山

再上山沿路指示不足,心想有咩唔對路,最多沿路折返,
呢段路需經過一段墓地,
穿過墓地就見到山上涼亭,
見到涼亭心情即刻安樂哂 ^^

景觀好舒服,樓景日日望,
所以我行山較喜歡揀啲望到海景嘅路線


响樹曬下太陽影下相,爽!


幾個酒鬼行完山又點會唔啤啤佢吖


hea 下,傾下,又到回程時間,
join 埋啲老公們一齊食個晚飯至散 band,
係盡興嘅 ^O^



最近懶打埋呢樹,但生活冇懶,
有煮飯同焗蛋糕比老闆食,
只係冇响呢樹 update,
但我有睇你地嘅 blog 架,
希望我快啲返番黎,唔好等呢樹了冇生氣啦 :)


最唔想見到嘅事終於發生左,
唔係自己能力範圍以內可解決嘅事,
好心痛 ... (放心,唔係我身體出事 :p) 
不過,幸好有個好錫我嘅老公,
响呢段時期扶住我,心靈上照顧我,
我還是感恩的 :)