happy 2014

 

 

2013 我過得好好，

這年裡我幸運地可做自己喜歡做嘅事，

我愛慢活，愛留在家，愛自家製，

閒時同家人好友分享自己嘅作品，

心感前所未有的滿足，踏實，及被愛 :)

 

 

從來唔會對自己定下任何目標，

每次想做嘅事都係隨遇而安，

沒有壓力下反而來得自然，輕鬆達成...

 

今日 2013 最後一日，

祝願家人，好友，卜友仔，

開開心心，越黎越靚，同身體健康呀，

happy 2014!!!

 

 

米紙卷

 

 

聖誕聯歡會好友指定要食米紙卷，

今次簡簡單單整左蟹柳同蝦兩款，

加牛油生菜，紅蘿蔔絲同青瓜絲，

但就冇落檬粉...

 

 

唔... 我都係覺得有檬粉靚仔啲同好味啲 :p

 

  

 

今次包得比上次靚左少少，

但都係嗰句，我嘅勞作實在係... @@"

focaccia 佛卡夏

 

 

網上見卜友仔整呢個包包好靚，

覺得好有聖誕 feel，

自己又試下玩下，

可以拎去同好友們分享...

 

呢種包好大自由度，

鍾意落咩就落咩，

身邊人喜歡食黑欖，

就下佢再加啲車厘茄，

橄欖油，蒜蓉，黑胡椒，粗海鹽同香草，

搞掂，不錯呢 ^O^

 

 

 

 

每年聖誕總會有聚會 (s)，

今年亦唔例外...

以前總會外賣食物，

呢幾年轉性後鍾意自己煮，

一大班人圍埋一齊食吓，飲吓，傾吓，

開心之餘又有滿足感...

 

聖誕小心意

 

自從無厘頭鍾意喱响廚房搞呢搞路之後，

但凡節日都喜歡整啲小作品送比身邊嘅人，

總係覺得收嘅人會開心，

好過買一堆未必合佢地心意嘅禮物...

 

今年聖誕整左一大堆 "特濃朱古力曲奇"，

包得靚靚送出去，

見佢地收時開心，自己真係好滿足，

呢啲就係烘焙帶比我嘅樂趣 :)

 

 

 

 

 

 

每次送上 "小心意" 時，

朋友見包裝精美，

常問︰真是你做的嗎？

 

雖被懷疑，但心樂透了 ^O^

 

小麥餐包

 

 

今個聖誕同班波友嘅聚會，

已被安排要交出兩盤新鮮麵包，

以我嘅 "低能力" 同屋企嘅小焗爐黎講，

真係怕佢地會失望 = ="

 

思前想後，為左縮短制作時間，

噚晚就試下玩 "低溫發酵"，

今朝早響雪柜拎佢出黎回溫，靜止，再發酵，

連焗至包包出爐，確係慳唔少時間...

 

最緊要係...啲包包都好軟熟呢 :)

 

 

 

仍然鍾愛小餐包，

只係配一杯香濃咖啡，

已經係一個美妙嘅早餐 ^^ 

 

 

 

 

試驗成功，咁就可以响聚會前一晚打定兩份麵糰，

第二日攞出黎做埋餘下工作，

咁就可以順利交出新鮮包包過佢地吃啦 :D

 

 

不過呢... 要入番啲白神酵母，

最近用佢做包好得心應手，

喺咁嘅氣溫下，發酵都唔係太長，

讚呀 ！！！

雪梨‧雪耳‧南北杏糖水

 

 

呢排好乾燥，每日起身覺得喉嚨，

連個頭都好唔自在...

噚日照鏡仲發覺啲皮膚由內乾到外面，

嘩，呢樣絕對接受唔到囉...

 

落超市見到啲鴨梨好靚，

就買幾個番屋企，連雪耳南北杏，

燉左一大盅，分兩晚飲用，

希望可以由內至外滋潤番...

 

女人响保養方面真係唔可以懶架 ^^

 

 

特濃朱古力曲奇

 

今晚約左幾個最要好嘅中學同學食飯，

呢幾個人對我呢個從來唔鐘意喱响廚房嘅人，

家下竟然偶有 "佳作" 而嘖嘖稱奇 :)

 

見咁難得一聚，

特別為佢地預備一點心意...

 

今次我跟 reko 嘅特濃朱古力曲奇，

效果好好，好香濃朱古力味道 ^^

 

 

 

包裝靚靚送出去，希望佢地喜歡 :)

 

 

 

 

簡易版有味飯

 

 

 

 

哈，平時巡下啲 blog，真係好有得著，

就好似今日見 班太 整左個 "a版臘味糯米飯" 好吸引...

 

見身邊人又出差得我一個人食飯，

雪柜又有齊所有材料，

我直情有樣學樣...

 

呢個簡易版有味飯，

唔使睇火，既方便又美味，

加上一大碗上湯西洋菜，

超滿足呢 ^^

 

今次我仲特登整多啲，

做埋聽日嘅午餐，呵呵 ^^

豬仔包

 

心心餐包又清哂，

今次學卜友仔玩卷包，

見人家整得圓碌碌，脹卜卜好得意...

 

可惜...我啲作品，

6 個裡得 1 個似樣啲 o.0"

 

 

 

 

中間仲要有 "通道" 添，

XDDDDDD

 

 

 

身邊人由細到大都習慣出外食早餐，

為左打破佢呢個 "定律"，

我唯有多做麵包黎 "引誘" 佢囉囉囉...

 

simple is the best

 

 

 

今早簡單嘅早餐，

加自家製包包，搭杯香濃咖啡，

好味，滿足！

 

 

 

噚日行完花墟，

路經太子一間專賣杯杯碟碟嘅鋪頭，

咁啱呢排想買個焗盤 (但又唔想買 LC，太貴了)...

呢樹啲價錢相當相宜，

終於忍唔住買左 6隻不同大小嘅碟，

同一個焗盤，埋單只係 $120，

超值呢！！！

cream cheese 小餐包

 

 

 

見雪柜仲有 cream cheese 存貨，

今日用左佢做我最愛嘅餐包仔，

食譜跟 "愛美麗"，

之前做過好鍾意好好味，

所以今日再 encore ^^

 

 

 

見 allie 整個心心餐包好靚仔，

自己又想玩下，

點知個爐今日唔知點解咁火，

搞到啲包包面深色哂，

唔靚仔囉... 激 c 人 o.0

 

 

 

 

今晚同朋友飯聚，

包裝好兩小包作為小小心意，

希望朋友們唔介意呢啲曬燶左嘅包包啦... :p

 

 

 

鴛鴦腸排骨煲仔飯

 

 

呢兩日涼左好多...

 

身邊人今晚冇應酬，

我問佢食煲仔飯好唔好，

因為我想用 staub 整，

以往整過兩三次都未如理想，

見今日涼涼地又的起心肝再黎過...

 

 

今次係咁多次最好嘅一次，

有佢最鍾意嘅飯焦，

但啲飯略為濕左啲，

下次要減多少少水

兩杯米份量，身邊人將所有飯焦清哂，

見佢食得開心，自己都覺幸福 :)

世事無常，

呢兩星期嘅起伏，

再一次提醒我，

珍惜身邊每一人...

 

無語

我家老媽舅父等長輩們，剛剛還為 a 老表大婚而高興不已，

一星期後的今天，卻為另一老表突然離去而傷心痛哭...

 

五舅父定居於英國，早前專程回港參予婚宴，

原定今日下午返抵英倫，落機時卻收到噩耗，

他的大兒子不幸心臟病發今早離世了...

 

老媽傍晚打給我，哭訴這個不幸消息，

我無語，只懂說：不要想太多，多點休息吧...

 

晚上嫂子 whatsapp 我們，老媽整晚都在哭...

我相信今晚，感情親厚的長輩們，會跟老媽一樣...

 

 

老表，我仍然無語，
只願你一路好走。
 

壽宴‧阿肥私房菜

 

 

噚日另一好友 k 小姐生日，

問佢想食乜，

佢諗都唔諗就話唔想出去食，

想我下廚，因佢一個人住，甚少有住家飯食，

既然佢唔嫌棄，我唯有盡力而為... :p

 

 

由於 k 小姐頗為大食，

是夜壽宴菜單設定為：

蕃茄薯仔鮮魚湯

油鹽水浸大蜆

辣酒煮花螺

油鹽焗肉蟹

上湯荳苗

泡菜豬肉餃

鮮百合杏仁露

 

油鹽水浸大蜆

(賣相唔精美，啲湯比啲粉絲 "索" 哂水 =.=)

 

 

辣酒煮花螺

(影相嘅時候已經比人食左一堆，搞到啲螺好凋零 =.=)

 

 

油鹽焗肉蟹

 

 

 

上湯荳苗 + 泡菜豬肉餃

加埋一支陳年花彫，一支 sake，一支白酒，

 

3 個人，飲埋杏仁露，滿足到爆燈！

鮮百合杏仁露

 

見到 班太 整杏仁露，

挑起我條糖水筋添  :)

 

同班太一樣落左成包鮮百合，

好滑溜...

杏仁露係中式糖水中我嘅最愛，

好味，滋潤，養顏 (靚靚喎) ...

加埋鮮百合，清火，潤肺，安神...

正到爆燈呢 XD

白神小餐包

 

 

真好，整包嘅意欲又返黎喇...

 

屋企仲有兩少包白神，

一於清埋佢先...

 

包包類我最鍾愛小餐包，

細細個，圓碌碌，脹卜卜 :p

 

 

呢幾日身邊人好多應酬 ，樣子很累 :(

 

今早，整個簡簡單單嘅早餐，

同佢打打氣，加油 :)

"尊重" 去左邊???????

 

 

 

老媽有 10 兄弟姐妹，感情非常親厚，

每次她娘家嘅喜慶事，眾人定必全力以赴，

就連我這班小輩，都不能閃避...

 

昨天表弟大婚日子，

因姨丈家係國內人，所以婚宴選址東莞...

 

東莞雖不遠，亦談不上近，

琴日朝隨大隊一大早就出發，

目的都係賀老表大婚之餘，好讓一眾舅父姨媽開心...

 

 

 

 

只可惜，昨天女主角 (新娘，香港人) 的表現真的令人氣憤，

我從未遇過一個新娘子係可以全日黑面，

躲在新娘房唔出黎招呼人客，

影相只有新老爺新奶奶，

一對新人嘅相片都欠奉...

 

辦喜事辨到新奶奶整天躲在一角流眼淚，

就連所有舅父，姨媽，小姨同我老媽都傷心失望，

我地呢班小輩望到都心痛...

 

你呢個新郎表弟，你只顧及你老婆嘅感受，

你可有考慮過養育你的嘅父母?

可有考慮過一眾老人家嘅感受?

可有尊重過專程過來替你高興嘅賓客呢?

(註： 40幾圍嘅人數啊)

 

從朝早 06 起身，差不多半夜 12 點幾至返到屋企，

我... 好累，同好嬲呀 ))))))))))))))))

 

 

 

香蕉雪芳蛋糕

 

屋企有隻熟到爛嘅香蕉，

消滅佢最佳方法就係開爐，

响牛油蛋糕同雪芳蛋糕裡作了一陣子選擇，

最後還是選了較輕盈嘅食法 ^^

 

 

今天的下午茶

很喜歡躲在家，

聽著音樂，焗焗蛋糕，做做家務，

幸福透了 :)

baked green tea cheese cake

 

人常說，朋友唔需要多，

真心嘅 1, 2 個已足夠...

我好好彩，我有一班，每個都真心待我，錫我...

 

而 m 小姐係我人生中最要好的朋友，

記得年輕時曾因某種誤會大家沒聯絡 (其實係我唔啱)， 

當時嘅佢身處海外，加上倔強嘅自己，

令大家嘅友情冷藏左一段時間...

 

後來，有一日，突然間好想好想向佢道歉，

而當時 email 並未流行，

長途電話又超貴...

我選擇了手寫一封道歉信，

 4 頁紙裡充滿誠意同眼淚...

 

約兩個星期後收到佢嘅回信......

.............................

一切都係值得嘅 :)

 

今日係 m 嘅生日，

我做左佢喜歡嘅 "green tea cheese cake"

 

happy birthday to you, my dearest friend, muah！

 

 

食譜我跟 "星期天的烘焙時光"

係低溫隔水焗嘅

呢包綠茶粉我喺 "富澤商店" 買，好香，好出 "色"，讚！

只可惜常常缺貨呢 o.0