2015年12月30日 星期三

流心芝士撻 ‧ v 仔

近期 v 仔機大熱,熱愛食窩夫嘅我,
一直同自己講:"唔關我事,唔關我事... 
我個窩夫機未壞... 係,雖然格仔唔夠深,成品唔夠靚仔................"
一路都相安無事嘅...


直至最近見到 blog 友 c chan 又展示 v 仔嘅威力 (簡稱放毒 :p),
又再挑起我嘅注意...
老闆見我日日係咁睇人家嘅 v 仔作品,
問我做咩齋睇唔買?  
我話舊嘅未壞唔想浪費麻,
跟住佢即刻打比佢外娚問有冇興趣接收,
答案係: 超有 :D
哈,就係咁,嗰日就走左出去百x滙問幾時有貨,
知道要等到 1 月尾,都好啦,照落訂...


之後响 v 仔官網見到一間教煮食學校亦有呢個訂購,
八卦打去問幾時會有現貨,
點知答案係 12月尾喎,
見到咁,就打去百x匯問訂金可否改訂模具,
得到正面回覆後,再去學校訂購,等12月尾收貨啦...


我好記得訂貨嗰日係星期三,星期六就收到送貨通知,
前後唔使一星期就見到我嘅聖誕禮物,yeah... ^^

收機後正直聖誕,我用過佢黎整芝士撻、甜甜圈,
真係好方便,尤其係整撻皮,
以後我整乜撻物撻時唔使戰戰兢兢喇...

今日又整定一批芝士撻預備明晚飯後甜品 
(因屋企人試過焗完即刻食,亦試過放雪櫃一晚後,
佢地不約而同話鐘意雪一晚後嘅口感喎...)


都係嗰句啦,我啲成品外型係有待改善嘅 :p



跟機又有 allie 嘅食譜書,
呢個新玩具又有排玩喇 ^O^


過埋明天 2015 就完結,
2016 不求更精彩,只望身邊所有人都事事順意,身體健康!
喂喂,你地 (blog 友) 都有份架,
歡迎對號入座呀 ^^

新年快樂!


2015年12月18日 星期五

christmas wreath


一直都喜歡松樹嘅香氣,
但屋企唔大,總唔能夠買一棵真松樹返屋企擺...

早前响 fb 見到一網上花店有教整聖誕花環,
知道店主响用料上都係用靚貨,
同埋,最緊要係用真松枝,
所以就報左名上堂 lu...


我嘅成品呀,
我都幾滿意架 (唔知羞 ing ...)
今年有佢放响屋企,
視覺同嗅覺都好有聖誕 feel ^0^





店主話可以放到農曆年,
當然啲玫瑰會謝嘅,
如果唔鐘意可以到聖誕節買新鮮嘅番黎換左佢,
但我就係鐘意佢地謝左嘅顏色,
到時仲 vintage 啲添呀 ^^



一口芝士包


好耐冇整包喇,
呢排懶到喱...

噚晚突然有股力量開壇,
打左個麵糰放雪櫃發酵,
今朝瞓醒繼續餘下嘅動作...

不過真係太耐冇整,
過程好唔得心應手 > <


成品頗樣衰嘅 "一口芝士包",
一啖一個,夠哂方便 ^^


好彩都好軟熟,算好味啦 :)


喂喂,精神,勤力番啲喇喂 )))))))

2015年11月23日 星期一

記敘 23.11.2015


近幾月娘家頗為多事之秋,
有喜慶,有煩瑣...

上星期五家中幼弟結婚了,
由開始籌備至 big day 當日,
期間數月裡擔當了不少次和事老... (煩爆), 
總算,總算順利完成,一家和氣!

老媽膝頭問題又奇怪地沒惡化,
見佢行動自如,輕鬆自在...
願佢老人家一直都傻呼呼的,開心的...

但又到老爸了,安排了明天做手術,
希望一切順利,儘快康復...


這段期間,家中植物幸好有老闆照顧,
還相當健康呢 :)

這盤 "檸檬薄荷" 由種子種起,
最近生長得很快,很壯


這盤 "薄荷仔" 由朋友捐贈一小棵種起,
已分成多盤了


這盤 "basil" 由水種開始,
起死回生了幾次


而這盤 "辣椒" 都是由種子開始,
噚日發覺終於出辣椒仔,
以後唔使去街市買喇,yeah!



我明白人生中總會有起落,
但我絕對喜歡平平淡淡的過,
真的希望現刻的鬱悶不是事實的...






2015年11月5日 星期四

札幌 ‧ 北海道


同美瑛 bye bye 後開車返回札幌,
交車後天色都已經入黑 lu (時間好唔夠用囉 > <),
去酒店 check in 後稍作休息,
之後食個老闆最愛嘅全蟹宴,
帝皇蟹同毛蟹,
不同嘅整法,令喜愛食蟹嘅老闆大滿足...


第二日,
早餐過後,就去 "北海道大學",
此次旅程最大嘅目的 ~ 銀杏同紅葉,
未去前有少少担心早兩日嘅大風雪會唔會令佢地有變化,
點知去到大學嘅銀杏大道門口,
不禁叫左聲 "嘩"!

兩旁銀杏樹好靚好靚,
靚到唔知點形容 ^^







响呢條銀杏路上散步,
唔知行左幾耐,
欣賞、讚嘆、相機同手機都忙個不停...

影影下,有個老伯伯踩單車經過,
望到我地停低,
用身體語言話幫我地兩個影相合照,
雖然我地冇咁嘅需要,
但老伯伯嘅一番心意實在太感動了...




行完銀杏大道,入去校園四圍逛,
紅葉雖然唔多,亦心滿意足了 :)







呢棵樹我超 like,
樹上有齊紅、橙、黃、綠幾隻色 ^^


大飽眼福後,要醫肚了...

臨走前整多張合照先 :)


翌日,8 天北海道週年之旅就咁完結喇,
今次旅程我形容為 kinda 出奇蛋,
除了機票,酒店同租車外,
我冇乜做過 research,
只係希望可以見到銀杏,同紅葉,
而結果係出奇地靚啦 ^^

而落雪呢下喱,
又好幸運地响我地停留美瑛嗰兩日遇上同感受到,
一切一切,令到今次呢本旅行相簿精彩了不少!


再一次多謝老闆,
你由唔鐘意旅行 (因成日出差好怕搭飛機),
變成每年總會陪我去一次長少少天數嘅,
你寵我,我知嘅 :)


2015年11月3日 星期二

美瑛 · 北海道


呢日朝早由洞爺湖坐 shuttle bus 出番去札幌,
沿途都見到咁嘅情境 (棵棵都好似聖誕樹),
景靚,但個心開始擔心起黎,
因我同老闆都冇雪地駕駛經驗...

中午出到札幌,
食左個快 lunch,
希望快啲攞車,快啲入到美瑛,
唔想入黑仲要係雪地上搵路...
(因 4 點多就會黑齊 @@)

點知 lunch 札幌市場雪突然大起黎,
本來去攞車嘅地方只需 5分鐘,
但最後我地拖住喼,
响大風雪下行左 10幾分鐘至到達,
當時身上每處都充滿着雪,全濕了,好狼狽 ...


交車時,租車公司很好已預先換好雪地車軚,
 心情稍微放鬆了點...

好,一切準備好,開車...
去美瑛路程需時 3 小時,
終於响呢 3 個鐘裡我地見識到北海道風雪嘅威力,
大風到令架車不時遙擺,
老闆要相當留神同捉緊軚盤,
最後,終於安全到達所訂民宿 (呼!)


經過今日嘅大自然威力,
晚餐過後,
沖完涼我地都即刻昏睡過去...

訂呢間民宿最大原因係佢地有 photo tour 可 join,
民宿老闆會帶我地去美瑛嘅景點影下相,
佢熟路好過我地自己浪費時間去搵吖麻...


第二朝起來,從房間望出去,
就知噚晚場雪都唔少呢...


相中架車就係我地呢 3 日嘅座駕,
車後小屋就係我地住嘅,
有私人洗手間、浴室,很不錯 ^^


民宿外小空地,當日早上天色不太好


吃過早餐後,出發去 photo tour...
民宿老闆話我地好幸運,因呢場雪早落左幾日,
佢帶我地去左唔少地方,
但我冇特別記底景點名,隨意吧,
睇相喇喂...






呢度記得 ~ 青池



太陽久唔久會出黎一下


小狗都黎睇雪


小雪人 (唔知邊個整),好得意


下午 1 點幾太陽終於出黎喇,
不過已經好有下山 feel...


成個 tour 由朝早 9 點至下午 2點,
只需 yen4,000,超值!

之後散 band 自由活動,
我地去左旭川站逛逛,
到晚飯時間至返去,
充實嘅一天 :)


呢日要走喇,
天氣好多了,藍天白雲,
雪都溶左唔少,
臨走前影多幾張民宿外貌同環境,
好喜歡!

民宿有分主樓,同 4 間小木屋





好喜歡美瑛,
愛佢嘅自然,寧靜,不造作,我知我會再黎嘅 :)

2015年10月31日 星期六

洞爺湖 · 北海道


每年 8,  9月係我同老闆嘅生日同週年日子,
近年大家都希望借呢個藉口出去外遊放鬆一下 :)

今年因為老闆 8,9月太忙關係,
呢個外遊改到 10尾至可以起行,
目的地決定係北海道,
因可以睇紅葉、銀杏... 
食地道日本菜同飲最愛的清酒 (酒鬼),
仲有仲有,我最最愛嘅浸溫泉 ^^

為左令老闆儘量休息,
今次 8 日旅程只會去 3 個地方,
札幌 ~ 洞爺湖 ~ 美瑛 ~ 札幌
洞爺湖嗰間溫泉旅館有免費 shuttle bus 接送,
所以只會响去美瑛嗰段自駕 (3天)...

不過,估唔到呢個咁 hea 嘅旅程都充滿着驚喜,
仲有驚險添  > <" (呢段容後再談)


好,睇相喇 ~

洞爺湖我地住响湖邊嘅旅館,呢樹係酒店大堂


我地房間外景色,當日天色麻麻


兩日早晚餐都係旅館裡食,唔使煩

今次我地飲左唔少靚清酒,
仲要揀貴價嘅黎飲,
因為真係平過香港好多,
咁... 冇理由唔飲架麻 :p


兩晚都係食懷石料理,呢啲小葉係料理裝飾,
我忍唔住帶左佢地番香港 :)

食完飯再對住個湖浸溫泉,大愛!



早餐望住呢個景,很不錯 ^^



到湖邊逛逛




天色開始轉晴,房間外嘅洞爺湖 ^^




太陽開始下山了,其實當時只係 4 點多




一地都係落葉



响洞爺湖 hea 左 3日2夜後,
跟旅館 shuttle bus 番札幌攞車自駕去美瑛,
美瑛呢段真係充滿着驚同喜,
詳情下回分解 :)