伯爵茶曲奇

今日舊舊舊同事大壽，

夜晚會同佢一家人食飯，

想整蛋糕又怕太熱，運送途中有閃失，

最後做左啲小甜點同佢賀壽 :)

早排買左啲食用乾花看門口，今次用得着喇，

曲奇用左 lady grey tea 茶葉整嘅伯爵曲奇，

再隨意咁放上乾花，效果都不錯吖 ^^

呢個舊同事我做女嗰陣時識嘅，

佢係公司茶水部姐姐，好錫我，

我睇住佢啲仔女結婚，佢今日70大壽喇，

希望佢幾時都一樣笑口常開，身體健康 ^^

班蘭戚風蛋糕

成人見人整班蘭蛋糕，心思思又想試下，

今日問老闆想唔想食，

佢話好喎...

收到 order 即去街市專賣泰國野嘅小店買左兩札班蘭葉，

然後加牛奶同椰奶打爛，隔渣留汁，

留番平時做戚風嘅份量

一路整嘅過程都好香...

純天然嘅顏色 ^^

好香好軟，個人認為好味過星加坡出名嘅手信 :p

成日冇出街，見又齊料，

再焗多一盤餐包做早餐

今次係 12 格，成盤變哂矮仔 > <

呢幾日天氣唔知想點，

天陰，大風，毛毛雨，潮濕...咩都齊...

搞到行唔到山  > <"

天氣快啲好啲啦，please......

咖啡抹茶三色戚風蛋糕

原來真係會嘅，

一係唔玩，一開始玩溝色就成日心思思想再玩...

自從上次個雙色後，

好想快啲再玩，終於今晚有飯局，

有哂藉口開壇啦...

今次呢... 係冇進步嘅，

依然咁矮小，啲窿多過上次，同大過上次 :p

雖然又係唔靚仔，

但佢始終有內在美，仲幾好味添 ^^

溝色戚風最好玩嘅地方，

就係落糊時好隨性，脫模時望到嘅花紋係會點...

嚴格黎講呢兩個溝色戚風嘅外型我唔係太接受，

但好 enjoy 過程，真係幾好玩架 :)

今晚係好友 m 小姐生日飯局，

因同主角太熟，所以直情問佢飯後想吃咩甜品，

呢幾隻味道係佢落嘅 order，

佢仲話唔好搞咁多野，唔使刎 cream，要原汁原味...

就咁，呢個就成為佢今晚嘅生日蛋糕喇 

(不過比我切開左研究左先 lu :p)

m, happy birthday to you ah xx

我呢兩個溝色戚風，响焗爐裡嘅進展係不錯嘅，

正常地扒高，但最後幾分鐘，突然會回縮...

請問，我邊 part 做錯左?

(單色我未試過有咁嘅情況的) 

抹茶雙色戚風蛋糕

一直唔敢玩雙色戚風，點解??

因實在太了解自己喇，

冇耐性、怕煩、粗手粗腳...

點知今朝起身，

腦袋第一個彈出黎想做嘅事，

竟然係雙色戚風 @@

好，就挑戰下自己...

想成品顏色有大啲對比，

選擇左做原味同抹茶 

(係偏心嘅，我係抹茶控麻 ^^)

蛋糕糊入模時聽人講話好隨意就得架喇，

但出到黎隨意到有啲得少少 :p

睇下...

同埋...

分開左兩個蛋糕糊，

唔知點解成件事好似繁複左好多咁...

fold in 時又粗魯左，

搞到個蛋糕又矮，又鬼死咁多窿窿 > <"

我問老闆 ：何解我咁鬼粗魯，溫柔啲得冇?

佢答：下? 全球華人都知你唔溫柔過喎...

我 ： 哦... 唔該哂... 好有鼓勵性囉 @@

原味綿花蛋糕

今個週末唔知邊樹黎嘅衝動，

喱响廚房一而再，再而三咁焗綿花蛋糕

唔係因為我精益求精，而係因為失敗再失敗... @@

第一個升得唔夠高，

第二個升得夠但放涼後個面皺到不堪入目 > <

呢個係第三個，但都唔係靚...

每焗一次，都要調較個爐溫，

終於比我較到個叫做適合焗綿花蛋糕嘅溫度

我個爐火氣猛，需放冰粒落水，水浴法

先用 150度 20分鐘至面上色，

再用 130 度 焗 60分鐘至熟為止

雖然個樣唔夠靚，

但其實佢真係好好味，好幼細，我 like

老闆食後表示都係 like 戚風多啲，

呵呵，我當然唔介意啦，

焗戚風爐火易掌握啲，又快搞掂 ^^

但我真係好想自己焗嘅綿花好似 allie 嗰個咁靚就好 lu...

紙包蛋糕

好耐冇同個焗爐傾計，

今日挑起條筋好想食最原始嘅紙包蛋糕...

仍然係我最喜愛嘅，簡簡單單的，

由細到大，從未變過 ^^

happy birthday to my hubby

今日老闆生日，

做左個佢喜歡嘅橙皮漬戚風比佢食...

話哂都叫做生日蛋糕吖，

所以打左啲 cream 刎刎佢，

再攞啲唔關事嘅 rosemary 黎裝飾下 (我愛綠色吖麻 :p)

搞掂 ^O^

祝老闆生日快樂，身體健康 xx

雜莓芝士凍撻

足足有個幾月冇 update 呢樹...

今晚姐夫下廚，

家姐想我整啲飯後甜品，

仲指明想食芝士凍撻，

都好吖，我想跟 allie 個食譜好耐，

終於可以開壇喇 :)

希望佢地鐘意 ^^

剛出嘅身體報告出了小亂子，

呢幾星期整個人好唔踏實...

冇玩烘焙，不過好彩仲識煮飯比老闆 :p

見佢比我更擔心，肉赤 > <

只希望下星期嘅跟進報告會有好消息啦..啦...啦 ^O^

芒果乳酪芝士蛋糕

好友女兒牛一，

今晚會出去同佢食餐飯，

佢媽媽想我呢個姨姨整個蛋糕比佢今晚切，

梗好啦 :)

近黎啲芒果當造，

而主角又係女生一名，

咁我又做一個清新啲口味啦，

冇 cream 冇咁漏吖麻...

"芒果乳酪芝士蛋糕"

呢個世侄女由細細個睇到佢前兩年大學畢業，

一路都好乖，好孝順 (呢樣我最鐘意 ^^)

畢業後又好自立地搵份正職，

到今日已經獨當一面...

雖然响出面好似好勁咁，

但返到屋企，對住爸媽，我地呢班姨姨，

仲係同以前一樣冇分別...愛撒嬌 :p

焦糖千層蛋糕

今晚同波友 g 生先慶生，

話就話係 "先生"，其實係 "姊妹" 黎 :p

佢好鐘意生日收蛋糕，

所以年年都會整一個比佢開心下嘅 ...

早幾日已經諗定整個千層蛋糕，

餅皮跟 allie，

餅面學 c chan 咁整焦糖，

諗住簡簡單單啦...

點知用火鎗整焦糖時，

啲忌廉頂唔順啲熱力瀉哂落黎，

成個餅有倒塌危機，

嗱嗱林將佢放入雪櫃定番個形先...

因為要搶救，所以個餅面唔夠焦糖色，激 c 人喇 > <"

另外，今晚仲要攞出去，

會唔會未去到餐廳時又黎一次架... o.O"

特濃朱古力瑪德蓮

今晚見朱古力狂迷 auntie，

以往都會整 brownie 比佢品嚐，

今次跟 allie 做左個 "特濃朱古力瑪德蓮" 過佢試，

佢對朱古力好高要求架，

唔夠濃味佢會扁咀的.... XD

簡單包裝，希望佢喜歡啦 ^O^

櫻花士多啤梨乳酪芝士蛋糕

個名好長懶係勁咁 :p

好友 T小姐生日，噚晚係佢嘅生日飯局，

T小姐都算係我周邊女性當中最為女性化嘅一個，

其他嘅都好似我咁，性格偏向男仔頭 XD

所以佢嘅蛋糕我想望落有女孩子味多啲，

 粉紅色應該走唔甩卦... (心諗...)，

就咁好快決定用櫻花漬 + 寒天粉做餅面，

蛋糕身就用新鮮士多啤梨 + 純乳酪 + cream cheese

只可惜，個蛋糕身可能雪得唔夠硬，

我放寒天液落蛋糕面時，

有少少芝士浮起而搞到個寒天液體唔清澈，激 c 人喇 :(

老闆話呢啲至係我嘅作品喎... (次次都係咁 "安慰我... > <")

話說回頭，呢個蛋糕冇落忌廉，

味道好清新，食幾多都唔驚，

同埋噚晚壽星女都好鐘意，

佢仲話好靚添 (哈，好明顯係夜媽媽睇得唔清楚囉... ^O^)

小紅莓瑪德蓮

今日回娘家食飯，

見 v 仔瑪德蓮烤盤終於到家，

今日就同佢開光先...

老媽喜歡食莓類，老爸喜歡糕點，

就跟 allie 嘅小紅莓 madeleines 嘅食譜，

細細件，唔使切，方便佢地食 ^^

剛烤出黎時外脆內軟，

涼左後個皮冇咁脆，但都好好味，

老闆都喜歡吃...

下次試下呢個食譜用窩夫烤盤，

或者更有驚喜 ^O^

blood orange chiffon

早前見 blogger c chan 整左糖漬橙皮麵包，

而我老闆對有橙味嘅制品零舍鐘愛嘅，

就咁噚日出左去 cs 富澤買番一盒看門口先...

之後經過水果部份，見到有血橙呢樣物體，

就記起早前响網上見有人用過黎整戚風，

見佢細細個，我又買左兩個黎試下...

不過咁喎，雖然個血橙細細個，

但水份超多，橙味又香濃，

我連啲橙皮，橙肉都唔放過放埋一齊焗，

好奇怪，血橙嘅汁原來好深色嘅，

但做左蛋糕後唔見左...

切件比老闆試下先，

佢好鐘意呀，佢話個橙味好突出，

而且咬到啲皮同橙肉時更好味喎 ^O^

我最近好放肆呀，

竟然又買左支甜忌廉看門口，

而家食戚風...

抑或食窩夫都唧啲一齊食，

好大件事囉... 我... @@"

今日嘅早餐 ~ 

焦糖香蕉窩夫 + 士多啤梨果醬，全自家制，

再配杯啡，食得好放肆，但好開心呀 (冇眼睇 :p)

blueberry cheese cake

老友 m 小姐今日牛一，

見呢兩日自己精神好好，

就整番個佢最愛嘅芝士蛋糕等佢開心下...^^

本來好好地，

點知手多多打左啲藍苺果茸放落去，

搞到個 cake 啲顏色奇奇怪怪咁 > <

今次做唔到樣靚，希望身材會正 (好味) 啦 :p

老死，happy birthday ah，

唔好當佢係生日蛋糕，

當係飯後甜品會好啲，hee hee... 

比利時窩夫 ‧ v 仔

自從有左 v 仔 後，早餐方便左好多，

食前一晚整定個麵糊，

第二日起身只係煮咖啡，開 v 仔就有得食，

快、靚、正...

對老闆黎講， 有得食之餘仲有得玩，

佢每次都係多多要求，

一 片加芝士，一片要 mixed cheese，

一片 plain 嘅，一片食練奶啦...

總之按佢當時嘅喜好黎落 order，

每次都唔同咁啦 :p

試左比利時窩夫，我還是喜歡美式，

輕盈啲，脆口啲 ^o^

cream cheese oreo cookies

近兩月家姐同事免費幫我頭髮染色做型，

我好想答謝佢，

但我又知佢本人煮野食好叻，

問家姐點算好...

家姐話："不如你整曲奇比佢對仔女吖，

佢一定會好開心嘅..."

曲奇，當然好啦... 

之後問左嗰對小朋友係 4 同 6 歲，

上網見到個 oreo 嘅曲奇，就即刻扑搥，

因我覺得 oreo 同小朋友係會好 friend 的... :p

嗱，就咁，我覺得成品係 ~ 

"我很醜，可是我很好味"

琴晚整定，包得靚靚，今早攞過去 ^o^

美式窩夫 ‧ v 仔

2016 第二日一早起身溝定個麵糊，

然後梳洗，煮咖啡，

之後時間啱啱好，

開機做個美式窩夫比老闆享用...

食完 plain 嘅後，

問佢有冇興趣食有芝士餡嘅，

佢當然話有啦 (其實佢知道我想試囉 :p)

打開雪櫃見有 parmesan cheese，

我不留情面地放了不少...

結果係咸咸香香咁，都幾好味道喎 ^O^

好魔鬼呀 )))))

流心芝士撻 ‧ v 仔

近期 v 仔機大熱，熱愛食窩夫嘅我，

一直同自己講："唔關我事，唔關我事... 

我個窩夫機未壞... 係，雖然格仔唔夠深，成品唔夠靚仔................"

一路都相安無事嘅...

直至最近見到 blog 友 c chan 又展示 v 仔嘅威力 (簡稱放毒 :p)，

又再挑起我嘅注意...

老闆見我日日係咁睇人家嘅 v 仔作品，

問我做咩齋睇唔買?  

我話舊嘅未壞唔想浪費麻，

跟住佢即刻打比佢外娚問有冇興趣接收，

答案係： 超有 :D

哈，就係咁，嗰日就走左出去百x滙問幾時有貨，

知道要等到 1 月尾，都好啦，照落訂...

之後响 v 仔官網見到一間教煮食學校亦有呢個訂購，

八卦打去問幾時會有現貨，

點知答案係 12月尾喎，

見到咁，就打去百x匯問訂金可否改訂模具，

得到正面回覆後，再去學校訂購，等12月尾收貨啦...

我好記得訂貨嗰日係星期三，星期六就收到送貨通知，

前後唔使一星期就見到我嘅聖誕禮物，yeah... ^^

收機後正直聖誕，我用過佢黎整芝士撻、甜甜圈，

真係好方便，尤其係整撻皮，

以後我整乜撻物撻時唔使戰戰兢兢喇...

今日又整定一批芝士撻預備明晚飯後甜品 

(因屋企人試過焗完即刻食，亦試過放雪櫃一晚後，

佢地不約而同話鐘意雪一晚後嘅口感喎...)

都係嗰句啦，我啲成品外型係有待改善嘅 :p

跟機又有 allie 嘅食譜書，

呢個新玩具又有排玩喇 ^O^

過埋明天 2015 就完結，

2016 不求更精彩，只望身邊所有人都事事順意，身體健康！

喂喂，你地 (blog 友) 都有份架，

歡迎對號入座呀 ^^

新年快樂！

綠茶芝士蛋糕

前文提及好友由美回港渡假，

踫巧今日係佢生日...

一直以黎佢從面書見到我嘅手作仔，

一直喊住話要食，

上星期煮左個海鮮餐比佢吃，

今日再整個生日蛋糕送比佢...

為左確定佢鐘意食邊款，

我响面書裡睇番佢比我嘅留言，

發現佢對綠茶芝士有一定程度嘅喜愛...

咁就好商量喇，最怕佢喜歡忌廉蛋糕姐 :p

仍然用蒸焗式嘅方法，

口感水潤啲 :) 

生日飯後給她一個驚喜，

原來呢個係佢人生中收嘅第一個自家制蛋糕，

見到佢好開心，我都一樣 ^^

happy birthday to you dear xx