2014年7月25日 星期五

清蒸雞蛋糕

 
 
早前見 blog 友 allie 整蒸蛋糕,
材料簡單,加上有 miele 幫手唔使睇火,
一於開工 :)
 
鍾意佢清清地,
充滿蛋香味嘅小點 ^O^
 
 
 
口感未夠鬆軟,
有待進步...
 
 
 
這兩星期發生嘅事令人好唔開心,
既然無法預知下一秒會發生咩事嘅話,
何不好好的、珍惜現有的、簡簡單單的生活?
 
 

2014年7月23日 星期三

冬瓜薏米水

 
 
是日大暑
 
噚晚浸定生薏米,
預備今日要煲冬瓜薏米水...
 
 
今次我將冬瓜切粒粒方便食,
加啲啲冰糖,甜甜地,
放入雪柜雪凍黎飲,好味!
 
 
今日真係熱到喱... =.="
 

2014年7月21日 星期一

綠茶芝士蛋糕

 



明天係舊同事 R 小姐嘅生日,
今日特別整左個佢最喜歡嘅 綠茶味 cheese cake 比佢 :)


 
响雪柜見到仲有 rosemary,
膽粗粗放兩條落去,見簡簡單單都唔錯吖 (自我安慰中...)
 
 
R 小姐係我舊同事,
我記得第一日返工時佢放緊病假,
一段時間後至見到佢復職...
 
佢年長我 10+ 年,
但兩個爽快嘅人一拍即合,
合作無間...
 
年後有一朝早,
佢同我講佢嘅病又再復發,
又需要停職接受治療,
記得當時我眼淚不聽話咁湧出黎,
仲需要佢安撫番我轉頭 (真失敗 =.=)
 
今日我已離職兩年,
而佢亦健健康康地繼續工作中打拼,
呢兩年裡每兩星期我都會抽一天同佢食 lunch,
感覺就好似親人一樣...
 
响樹,我祝願 R 小姐生日快樂,
往後嘅日子都開開心心,最緊要身體健康呀 ^O^

2014年7月16日 星期三

粟米吞拿魚麵包

 
 

近排响街市見啲粟米幾靚,
忍唔住買左條番屋企蒸熟佢,
再開罐吞拿魚,開工整包 :)


 
 
繼續 miele 幫手發酵,非常穩定
 
 
今次包餡終於有啲進步 (唔知羞 ing) ^o^
 
 
呢兩日打風前嘅天氣真係熱得誇張,
大家記得飲多啲水,
小心中暑呢 ...
 
 
 
我想講,我唔介意人遲到/唔到 (慣性者除外),
但可否先通知聲,等人家可以另作安排,
此乃尊重! 講完!
 

2014年7月14日 星期一

粢飯

 
 
繼續蒸...
 
以前好鐘意食粢飯,
鐘意程度係...
啱啱出黎做野時,
曾經試過食兩個粢飯做早餐 (相當恐怖) @@"
 
而家當然唔得啦,
半個都夠哂數,少食多知味:)
 
而家出面嘅粢飯飯多餡少,
自己整嘅想點都得,嘿嘿 ....
 
 
 
 
 
 
好滿足嘅一個 lunch ^o^
 
但,唔知點解,我已經將啲糯米浸過夜,
跟住又蒸左 50 分鐘,
都好似唔係好熟咁...
 
請問大家有冇心水邊隻糯米正呢?
 

2014年7月13日 星期日

溫泉蛋 ‧ miele

 
 
今日第一次玩蒸溫泉蛋,
hm.... 今次蛋白太稀,
下次要多蒸幾分鐘至得...
 
 
蒸完隻蛋,
又整多次個韓式辣醬拌麵比老闆食,
放埋隻蛋上去一齊撈,
都不錯 :)
 
 
睇黎呢個拌麵會成為我一人前午餐嘅大熱,
簡單易整好味!
多謝 blog 友嘅分享 ^o^

2014年7月12日 星期六

意大利香草麵包

 
 
 
今晚又有飯局,朋友主場,
主打海鮮,
每家預備一或兩樣...
 
响呢班烹飪高手面前,
我最多整新鮮麵包作為報答,
佢地之前食過呢個香草包好想再食,
咁當然冇問題啦 ^o^
 
 
 
今次冇落蒜蓉,但... 我更喜歡 :)
 
 
只係唔記得放 baking paper,
搞到好難甩膜同有啲樣衰囉 =.=

 

2014年7月11日 星期五

泡菜拌麵

 
 
近日見 blog 友整泡菜拌麵,
仲話好好食...
 
見要用嘅材料差不多都有,
只需要買韓國素麵就齊哂,
今日個 lunch 就決定拌一拌佢...
 
將韓式辣醬,黑醋,醬油,糖,加啲啲麻油,
撈落個麵裡,味道酸酸辣辣咁,
真係好正,好啱呢啲天氣食 ^^
 
 
 
 
今晚同波友有定期飯局 (每月一次,我地稱為月經飯 :p),
按佢地喜好,整左個 triple 份量嘅 brownie 比佢地嘆,
伴雲呢拿雪糕食,應該滿足到爆燈!
 
另外,其中一個波友嘅仔仔又話想食芝士包,
所以今日比較忙...
今次發酵我用 miele 幫手,
好快搞掂成個整包程序,
愛死!

2014年7月10日 星期四

滑滑燉蛋 ‧新成員 (miele)

 
 
考慮左大半年,終於...
 
上星期家裡多左個新成員 (miele 蒸爐),
有左佢之後我每晚都好輕鬆咁做飯,
整體黎講每晚都只係用半個鐘連洗連煮,
真係超方便我呢啲煮飯唔叻嘅人...
 
有時候,老闆出差得我一個人開飯,
以前就一定唔會落米煮,
但而家半杯米都可以蒸,
啱哂我呢啲飯桶 ^^
 
我試過蒸蟹、蒸魚、蒸水蛋、蒸瓜菜,
白飯、有味飯都係用佢黎蒸,
較好時間,一次過蒸,
一齊蒸好熱騰騰上枱開飯,真好!
 
 
今晚又整左燉蛋做飯後甜品,
唔使睇火就有滑滑燉蛋食,
老闆食得好開心,滿足!
 
 
 

 
老闆近年多應酬,成日大魚大肉,
為左佢嘅健康,
佢返黎食我都係主力蒸煮比佢...
 
所以,新成員黎左我屋企後,
見到老闆每次都食得開懷、健康,
呢個新成員係值得投資嘅 :)
 
 

2014年7月3日 星期四

一口芝士餅

 



有次朋友聚會,
佢地話想食芝士餅,
咁當然冇問題啦...
 
呢次我用左小 muffin 膜黎焗,
細細件,唔使切,
一口一件,超方便 ^o^
 
 

 
 
 
如有充足時間,
芝士餅我都係喜歡用低溫隔水蒸焗,
口感會綿滑啲,脫膜又會靚仔啲,
唔會好似呢堆咁......囉... =.="

2014年7月2日 星期三

雙芝包

 
 
打開雪柜,星野仲有兩次,
要開工了...
 
今次唔問老闆想食咩,自己決定 :)
見雪柜有唔少芝士,
就決定整 "雙芝包",
cream cheese + mozzarella ^o^
 
 
 
今次學人玩造型,
將芝士藏入麵糰裡再將佢扭卷,
之後頭尾再匯合...
 
 
 結果呢 ...
仍有好多進步空間 :p
 
 
mit 開後見啲芝士溶哂,
個包組織都唔錯,
咬落去軟熟,芝士味香濃,
總算有啲內在美啦.. 啦...
 
 
 
今日天氣好熱...
戶外工作嘅人辛苦了...