舊鞋子

早前無意中响面書發現 "舊鞋救命 step 30" 呢個台灣機構，

其一使命係將舊鞋帶過去非洲，

給當地孩子能夠有一雙鞋子穿上，

可以幫助佢地抵抗致命嘅沙蚤，

好等佢地可以上學讀書，健康生活...

睇完後，腦裡一直記住...

剛過去嘅週末，

我同幾個愛吃嘅好友去左台北一轉，

响早幾個星期前我先聯絡呢間機構，

會否响我去台北嗰幾日有收舊鞋嘅活動安排，

幸運地7號那天响大直區就有一個，

然後打開鞋柜看看有邊啲唔會再着，

清洗，曬乾，處理得乾乾淨淨，

再然後就跟住我去台灣 lu...

當天嘅情況，簡簡單單的，

但現場都有不少人捐出一袋袋嘅舊鞋，

工作人員亦小心地去檢查鞋子適合與否...

小小心意

有興趣可望望 "舊鞋救命 step 30" 嘅網頁

http://www.step30.org/step30/

朋友話香港都有收舊鞋嘅機構，

可能我冇留意到啦...

不過，只要鞋子捐出而真的有人受惠，

那裡都可以 :)

一切安好

跟進嘅身體報告出了，

沒有壞嘅方向... (感恩)

問題當然係有嘅，

但已經算係微不足道了，

冇藥可食，唯有靠自己免疫力對抗...

我要加陪自己嘅傻大姐精神，

飲食再健康啲 (其實都好 ok 健康喇喎)，

再多啲運動時間，

同埋，多啲蒸蒸焗焗，

放鬆自己嘅天生緊張大師性格至為重要 ^^

家中嘅植物得老闆細心照料，

大家都翠綠，強壯同茂盛 :)

今次呢件小風波害得身邊人，少數老死擔心了一場，

所以呢個結果對佢地都係一個最好嘅回禮了...

响樹亦都多謝咁多位 blog 友仔你地嘅留言同祝福，

我地雖素未謀面，

但你地嘅關懷我真心感受到，

好感動...

多謝妳.....地呀！ 

雜莓芝士凍撻

足足有個幾月冇 update 呢樹...

今晚姐夫下廚，

家姐想我整啲飯後甜品，

仲指明想食芝士凍撻，

都好吖，我想跟 allie 個食譜好耐，

終於可以開壇喇 :)

希望佢地鐘意 ^^

剛出嘅身體報告出了小亂子，

呢幾星期整個人好唔踏實...

冇玩烘焙，不過好彩仲識煮飯比老闆 :p

見佢比我更擔心，肉赤 > <

只希望下星期嘅跟進報告會有好消息啦..啦...啦 ^O^

我重生喇

我又重生喇！

係咁嘅，話說過年前年廿五嗰日覺得喉嚨有啲怪怪地咁，

嘩，我呢啲藥煲梗係唔敢唔理啦，嗱嗱林去左睇醫生，

好乖咁食藥休息等好番... 

因為除左農曆年到外，

大年初二仲有一個我負責嘅 "18口家族旅行" (呢個容後再分享)，

所以真係不能夠比自己病架嘛  >.<

到左年廿九，大年初一，自問仲係呆呆滯滯，

老闆話唔緊要啦，放鬆啲，

個旅行嘅安排你已經做哂，到時煮到黎未食囉...

點知大年初二出發嗰日唔知邊到黎嘅精神，

好精伶咁一家人齊齊整整咁出發，

一路上都好精神咁打點到回程嗰日 (年初六)，幾叻叻呀！

就係落機嗰晚，"成副計" 又再 lum 左...

第二日再去睇醫生，醫生話 : 你嘅感冒 a 未好番，但又遇上感冒 b...

吓?! 唉... 何其熱鬧，就係咁，我由年初七一路瞓响張床，

瞓左足足一個星期，真係好辛苦，好難受...  

今日，終於精神番好多喇，

我知道你地心底裡都有少少擔心我去左邊，

所以好番啲啲即係報個平安先 ^^

講住咁多先，响樹一次過祝大家猴年身體健康，龍馬精神！

兼今日又係元宵節，祝大家一家人齊齊整整，同身邊人甜甜蜜蜜 ^O^

記敘 23.11.2015

近幾月娘家頗為多事之秋，

有喜慶，有煩瑣...

上星期五家中幼弟結婚了，

由開始籌備至 big day 當日，

期間數月裡擔當了不少次和事老... (煩爆)， 

總算，總算順利完成，一家和氣！

老媽膝頭問題又奇怪地沒惡化，

見佢行動自如，輕鬆自在...

願佢老人家一直都傻呼呼的，開心的...

但又到老爸了，安排了明天做手術，

希望一切順利，儘快康復...

這段期間，家中植物幸好有老闆照顧，

還相當健康呢 :)

這盤 "檸檬薄荷" 由種子種起，

最近生長得很快，很壯

這盤 "薄荷仔" 由朋友捐贈一小棵種起，

已分成多盤了

這盤 "basil" 由水種開始，

起死回生了幾次

而這盤 "辣椒" 都是由種子開始，

噚日發覺終於出辣椒仔，

以後唔使去街市買喇，yeah!

我明白人生中總會有起落，

但我絕對喜歡平平淡淡的過，

真的希望現刻的鬱悶不是事實的...

近況

由開始寫 blog 都係想分享開心嘅事，

唔開心，厭悶嘅從來都唔願提...

噚日睇左 blogger daphne 嘅最新文章，

突然間腦海裡 "叮" 了一聲，

係嘅，開心，唔開心嘅都係一種回憶，

沒理由自己一生裡只有喜沒憂的，

這是人生經歷嘛...

今日同老闆去花墟行了一圈，

破例買了粉紅色花回家插，

粉紅從來唔係我杯茶，奇怪！

繼早前鬱悶事件輕左 5 磅後，

最近又到老媽了...

老人家膝頭退化，

唔願做手術，只想食止痛藥了事，

可惜胃部已受不住，

勸左好耐都係唔想做，只想拖...

見佢眉頭深鎖，好心痛...

啱啱呢個 8 月極為厭悶，

希望 9 月份有新嘅開始，

將所有厭悶感一掃而空！

小甜點

今晚球隊月經 bbq 聚，

呢兩日歡天喜地咁整左一大堆甜點比佢地食...

點知因為某種原因，

我出席唔到...

對住面前咁多小甜點，

點算 ???

人與人之間真係好複雜，

活左咁多年，

我仍然係咩都放响塊面上 (冇鬼用 ><")，

與其黑住面、笑唔出，

倒不如唔出席...囉...

媽媽，生日快樂

剛過去嘅星期天媽媽生日，

一家人齊齊整整、熱熱鬧鬧地過...

媽媽唔食芝士，

我唯有整忌廉蛋糕，

今次刎 cream 大膽左很多，仲學埋人唧花添 = ="

結果係... 啲邊一忽忽之外，

最後竟然唔夠 cream，

搞到個 cake 邊古古怪怪咁... 真搞鬼 XD

媽媽，

再次祝你生日快樂、

日日都開開心心，

最緊要身體健康呀 )))

前日熱鬧過後，

噚日朝爸爸打比我，

話條腰好痛，應該係剛拖地時整親 > <"

即刻飛的陪佢睇醫生，

陪佢一整天，見佢食完藥面色好番啲才安心啲...

今早起身打比佢問佢情況，

佢仲精精神神話好番好多啦啦啦，

點知中午過後突然嘔吐大作 :(

當下又即刻飛過去同佢去醫院，

好彩醫生話應該係噚日啲藥太過強勁，

爸爸受不了而已，不是大問題 (呼！)...

6兄弟姐妹今晚全部集齊娘家，

見爸爸活動自如，胃口正常才放心離開...

爸、媽，要乖，緊記身體要健康喔！

原味瑞士卷

近黎少更新這裡，

可能作品都係差不多...

唔打緊，

想寫就寫，唔想就放空一下吧 :)

上星期手痕整左兩次瑞士卷，

味道不錯，

就係卷功同刎 cream 方面超有 homemade feel :p

第一次 ~

第二次 ~

明天回娘家食飯，

再整一條少忌廉版給老爸老媽吃 :)

最近去了 "惜食堂" 當義工，

在廚房裡幫手洗洗切切，和預備飯盒...

只是出少少綿力，

幫到人嘅感覺真的不錯！

打氣 brownies

今日做左兩個 brownies，

目的都係一樣，

給朋友打打氣 

好友 k 小姐爸爸入了醫院，

情況不佳，

aunt 心情好低落...

每年 7 月我都會做個 brownie 同呢個朱古力狂迷 aunt 賀壽，

眼見老人家呢幾日悶悶不樂，

就做個佢最愛嘅 brownie，

目的想佢吃點甜會開懷啲...

另外一個係送比老闆國內同事，

呢個小妹年紀輕輕卻不幸地响年頭要做開腦手術，

手術後至今已半年有多，

曾答應過佢要乖乖養病，

我會整個 brownie 送比佢

今日老闆公司聚餐，國內大部份同事都來了，

知道呢個小妹都會來，

我就整左個 mini 嘅，

今晚比佢一個驚喜吧 :)

我好想個 brownie 濕潤啲，

今次我又玩低溫水浴法，

效果不錯呀 ^^

最近聽到幾個身邊朋友家裡嘅長者，

包括我姑姐在內，

身體都出了毛病，

真心希望 "你們" 今次順利渡過，

身體要健康喔 ！

無題

 

 

上星期同老闆外遊數天，

大家都覺得 15 週年要重視一下吧！

 

 

 

 

本來高高興興的，

回來後自己長大的地方變得很陌生，

這兩天很鴕鳥的留在家煮飯，

盡量唔去接觸新聞，

因望一次哭一次，

可能較誇張，或我眼淺吧，

好痛心！

 

只希望外邊的你們，

全部都可以安全回家...

 

我沒有信仰，但今次...

真心... 真心祈求上天，

能保佑我生活了四十多年的香港，渡過這個難關！

 

 

粟米吞拿魚麵包

 

 

近排响街市見啲粟米幾靚，

忍唔住買左條番屋企蒸熟佢，

再開罐吞拿魚，開工整包 :)



 

 

繼續 miele 幫手發酵，非常穩定

 

 

今次包餡終於有啲進步 (唔知羞 ing) ^o^

 

 

呢兩日打風前嘅天氣真係熱得誇張，

大家記得飲多啲水，

小心中暑呢 ...

 

 

 

我想講，我唔介意人遲到/唔到 (慣性者除外)，

但可否先通知聲，等人家可以另作安排，

此乃尊重！ 講完！

 

我的母親節

 

 

 

今日打開信箱，

收到助養左 10 年仔仔嘅信，

信中透露他家庭 / 社區已有能力可自行發展，

來信係向我道謝及道別...

 

時間過得真係好快，

第一次睇佢張相，

由一個小小人兒不知所措的樣子，

到今天有自信的笑望著鏡頭，

我感動了...

 

 

 

想不到今日呢個節日，

我呢個無兒女嘅港女，

亦能感受到一丁點當母親嘅欣慰... 哈 :)

壞習慣

 

 

 

我有一個 "壞習慣"，

天氣有多冷對我黎講都唔係問題，

但每當天氣回暖我就會病倒，

我... 真係怪人一個！

 

上星期中回暖的某一天，

朝早落床時感到天旋地轉，

响咁嘅情況下，當然邊度都唔使去，

被老闆 "軟禁" 在家 =.="

 

今日見悶悶地，

攞部相機同新成員 "薄荷仔" 影番啲相，

感覺上有番啲生氣  :p

 

 

我愛薄荷嘅味道，

用佢黎沖水或蜜糖茶，

我亦愛用佢黎做餅面裝飾，很美  :)

 

 

 

我想快啲好番呀 )))))))

鴛鴦腸排骨煲仔飯

 

 

呢兩日涼左好多...

 

身邊人今晚冇應酬，

我問佢食煲仔飯好唔好，

因為我想用 staub 整，

以往整過兩三次都未如理想，

見今日涼涼地又的起心肝再黎過...

 

 

今次係咁多次最好嘅一次，

有佢最鍾意嘅飯焦，

但啲飯略為濕左啲，

下次要減多少少水

兩杯米份量，身邊人將所有飯焦清哂，

見佢食得開心，自己都覺幸福 :)

世事無常，

呢兩星期嘅起伏，

再一次提醒我，

珍惜身邊每一人...

 

無語

我家老媽舅父等長輩們，剛剛還為 a 老表大婚而高興不已，

一星期後的今天，卻為另一老表突然離去而傷心痛哭...

 

五舅父定居於英國，早前專程回港參予婚宴，

原定今日下午返抵英倫，落機時卻收到噩耗，

他的大兒子不幸心臟病發今早離世了...

 

老媽傍晚打給我，哭訴這個不幸消息，

我無語，只懂說：不要想太多，多點休息吧...

 

晚上嫂子 whatsapp 我們，老媽整晚都在哭...

我相信今晚，感情親厚的長輩們，會跟老媽一樣...

 

 

老表，我仍然無語，
只願你一路好走。
 

"尊重" 去左邊???????

 

 

 

老媽有 10 兄弟姐妹，感情非常親厚，

每次她娘家嘅喜慶事，眾人定必全力以赴，

就連我這班小輩，都不能閃避...

 

昨天表弟大婚日子，

因姨丈家係國內人，所以婚宴選址東莞...

 

東莞雖不遠，亦談不上近，

琴日朝隨大隊一大早就出發，

目的都係賀老表大婚之餘，好讓一眾舅父姨媽開心...

 

 

 

 

只可惜，昨天女主角 (新娘，香港人) 的表現真的令人氣憤，

我從未遇過一個新娘子係可以全日黑面，

躲在新娘房唔出黎招呼人客，

影相只有新老爺新奶奶，

一對新人嘅相片都欠奉...

 

辦喜事辨到新奶奶整天躲在一角流眼淚，

就連所有舅父，姨媽，小姨同我老媽都傷心失望，

我地呢班小輩望到都心痛...

 

你呢個新郎表弟，你只顧及你老婆嘅感受，

你可有考慮過養育你的嘅父母?

可有考慮過一眾老人家嘅感受?

可有尊重過專程過來替你高興嘅賓客呢?

(註： 40幾圍嘅人數啊)

 

從朝早 06 起身，差不多半夜 12 點幾至返到屋企，

我... 好累，同好嬲呀 ))))))))))))))))

 

 

 

baked green tea cheese cake

 

人常說，朋友唔需要多，

真心嘅 1, 2 個已足夠...

我好好彩，我有一班，每個都真心待我，錫我...

 

而 m 小姐係我人生中最要好的朋友，

記得年輕時曾因某種誤會大家沒聯絡 (其實係我唔啱)， 

當時嘅佢身處海外，加上倔強嘅自己，

令大家嘅友情冷藏左一段時間...

 

後來，有一日，突然間好想好想向佢道歉，

而當時 email 並未流行，

長途電話又超貴...

我選擇了手寫一封道歉信，

 4 頁紙裡充滿誠意同眼淚...

 

約兩個星期後收到佢嘅回信......

.............................

一切都係值得嘅 :)

 

今日係 m 嘅生日，

我做左佢喜歡嘅 "green tea cheese cake"

 

happy birthday to you, my dearest friend, muah！

 

 

食譜我跟 "星期天的烘焙時光"

係低溫隔水焗嘅

呢包綠茶粉我喺 "富澤商店" 買，好香，好出 "色"，讚！

只可惜常常缺貨呢 o.0