2014年10月31日 星期五

牛奶煉奶小餐包



今晚有聚會,
好友指明想食小餐包...

今次我加左煉奶,
出爐嘅時候成間屋好香奶味 :)





見到啲包包圓碌碌、
脹卜卜,好可愛!

烘焙真係會令人心情變好 ^O^



2014年10月29日 星期三

紫薯小卷


包紫薯粉仲有兩次,
再用佢黎焗包包,
今次整小卷,
細細個,好喜歡!




麵包我鐘意冇餡,
鐘意食咩就搽咩,
所以我嘅喜好其實都好局限自己嘅出品...

常見其他 blogger 整好多好靚款式嘅包包,
每次見到就手痕,
但整完又食唔得多,
始終最愛 plain 嘅麵包,
尤其係小餐包 :)


我仍努力回復自在中,
對有關方面嘅消息還是採取盡量 "拒絕接收" 嘅態度,
係有點 "鴕鳥" ,
但自已嘅身體還是較重要嘛...
因近月睇中醫都話我成個人繃繃緊,
叫我要自行放鬆,
只有我自己至可以幫到自己...
所以,我仍需加油 :)



近日响 "面書" 看到這篇文章想跟大家分享,
源自 "常霖法師"

"香港社會這幾個星期以來出現的問題,
導致很多人感到不安和擔憂,
最近收到不少信眾的訴苦,
和詢問安心的辦法。
我認為現時大家最重要的是照顧自己的心,
不管立場如何,
對每天發生的事只需知道就好,
不要持續追看有關的新聞報導和網上訊息,
為這樣只會不斷灌溉心中憤怒和不安的種子,
會變得越來越偏激,
進而導致家人和朋友之間的不和。

只要我們在生活中持續禪修的練習,
那怕只是把心念回到注意自己的一呼一吸,
就可以提升自己的覺察能力,
不容易受外境所困,
令自己的內心回復本來自在的感覺,
才能繼續為自己相信的目標而努力。"

2014年10月21日 星期二

菠蘿包



早前見 allie 整 菠蘿包,
心癢癢想整,
一路拖到今日,
終於開工 :)


瞓醒打粉,
終於响 3 點 3 前搞掂,

香港人嘛,
3 點 3 緊係食菠蘿包啦
偶爾放縱一下吧 ^^




2014年10月20日 星期一

紅棗雪耳糖水



天氣明顯轉涼了,開始乾燥...

老闆北上整天晚上回來,
頻頻撲撲,
雖唔需要預備晚飯,
但總想為佢做點吃的...


"紅棗雪耳糖水"
清熱滋潤,紅棗又可養血安神,
希望老闆可以有覺好睡 :)





最近應該有好多香港人食不好、睡不穏,
包括自已在內,
唯有多吃點甜,心情會好點 :)

一起加油吧!

2014年10月19日 星期日

臘腸滑雞蒸飯


今年生日好友 k 小姐送了個 LC oval 比我,
記得送嘅時候係正值颱風 "海鷗" 襲港差不多要掛 8 號風球當晚,
風雨交加,加上個煲好重,
佢都親自踩住高踭鞋送黎,
見佢時係左手 LC,右手蛋糕 + 雨傘...
我當刻真係感動到不得了,
所以,我形容佢份心意係開心過收鑽石呢 
(不過其實我對鑽石係麻麻地) ^^

雖然粉紅色唔係我杯茶,
但總算唔係大紅大紫刺眼嘅顏色系列 :)
 收到後直到今日,
因為佢嘅容量好啱我,所以佢嘅使用率相當高,
燉湯、蒸有味飯、炆餸,
好幫得手 ^O^


今晚同老闆兩個想簡簡單單,
就買左半隻雞,放兩條臘腸,兩杯米,
入蒸爐半個鐘,搞掂!


响超市見到有椰皇,
就買個返黎整 "椰皇蛋白燉鮮奶" 做飯後甜品,
蒸完飯後放佢入去,
食飽飯坐陣啱啱好有得食,
好滋潤,好好味 ^O^




2014年10月17日 星期五

15 週年遊 ‧ 沖繩本島 (下)



由 "久米島" 返 "那霸" 後,
繼續我地餘下 3 日兩夜嘅超 hea 旅程...


响機場搭 shuttle bus 去 ots 攞車後,
隨即揸去 "恩納" 嘅酒店 check in...


呢個就係房間外嘅景色 ^^


黃昏時候




因為超 hea 冇行程,
所以所有道路我地都係選擇 "冇料",
因為我地完全唔急趕嘛...

而好多時 "冇料" 嘅道路都係沿海嘅,
架車揸到邊,覺得個景靚,就停低行下坐下,
真好 ^^


好有趣,呢頭曬到你暈


嗰頭又烏雲密佈,雷雨交加


以下都係沿途嘅風光






呢度係 "讀谷山燒的窯場" 集中地,
位於中部一個小山頭,
有不少陶瓷小店,
亦有陶瓷工場...

一個令人心情平靜嘅地方,喜歡!



雨後彩虹


今次沖繩之旅去得最多係不同嘅超市,
一般嘅烘焙,煮食材料都比香港平,
紫薯粉、上白糖、黑糖... 等等,
老闆仲抬左包 5kg 白米,
佢話呢包 5kg 嘅價錢等如香港 2kg,
佢仲話都係放入行李裡,冇所謂啦....啦...
就係咁,兩個人行李箱都塞得飽飽咁番香港 lu... ^^


沖繩呢個只需兩個幾鐘機程嘅地方,
動靜皆宜,豐儉由人,
當地人又有禮貌,又可享受駕駛嘅樂趣,
大愛!

2014年10月16日 星期四

15 週年遊 ‧ 久米島



今次沖繩之旅嘅亮點係 
"兩日一夜久米島 ~ 終端之濱",

前往 "久米島" 嘅方法可坐船或飛機,
坐船的話需要 4 個鐘,
而內陸機只需半個鐘,
為左令時間好用啲,
我地選擇坐內陸機前往...

另外,前往 "終端之濱" 係要再由 "久米島" 乘坐半個鐘小船,
搜羅哂資料,我地可以 join 當日下午嘅團,
如果有咩差池,
仲可以第二日上午去,
因我地訂左下晝機返那霸,
確保萬無一失,
只差天氣未能估計罷了...


呢架就係當日送我地去 "久米島" 嘅微型飛機,
全機只有廿幾個座位 :p 

因颱風 "鳯凰" 嘅關係,
加上呢架微型機,
成個機程好似坐過山車咁 ^^"



好彩好快就到,隨即去酒店 check in,
跟住報名當日下午去 "終端之濱" ,
點知真係 "天氣不似預期",
因為 "鳯凰" 嘅威力下,
當日所有團都取消了...

咁我地問明天上午有可能出團嗎?
好彩佢地話明天應該可以,
咁我地就收拾心情,租架小車閒遊 "久米島"...


"叠石"



"比屋定"




雖然冇落雨,但真係好大風,吹到個人暈暈地 @@"
第二日又要早起,所以好早返酒店休息...
期待明天天氣會好,會放晴...


第二日一早打開窗廉望下個天,
冇好轉亦冇更差,
好,起行!

我地就係坐呢隻小船前往 "終端之濱",
半小時途中真係驚濤駭浪,
終於黎到喇...


當然有失望啦... 
不過無計,天氣真係預計唔到嘅 :)








臨走前個天好黑,跟住落左一場大雨



雨後竟然放晴,但因差不多要離開了,
所以影得好少相 :(



我啲相影唔到 "終端之濱" 嘅美麗,
唯有借網上嘅相片話比大家知佢真係好靚架 :)




帶住少少失望嘅心情返酒店,
其實當日下午嘅天氣開始轉好,
但我真係要離開 "久米島" 呢 :( 





回程機上 "久米島" 嘅外貌



機上清楚望見
以綿延 7 公里嘅白色沙灘著名嘅 "終端之濱"


和不少不知名嘅外島s