2016年12月11日 星期日

慢煮 "西班牙黑豚豬梅肉义燒"


又中毒了 ...

近幾個月自己睇開嘅網頁總會有 "慢煮捧" 嘅出現,
一直都覺得呢支棍唔係自己杯茶,
煮中餐多嘅我會好少用到佢...

唔知點解越唔理越唔睇,
啲資訊總係會湧埋黎,
跟住就自言自語咁覺得其實中餐都有好多地方用到佢喎 
(好明顯女人買野係有佢自己嘅理由)...


身邊唔少人,包括自己,
好鬼鐘意食义燒,
出面嘅一係唔好食,好食嘅又貴...
買呢支棍最大原因都係可以整到啱自己同屋企人口味嘅义燒 ^^

噚晚有朋友上黎食飯,
就胆粗粗試整喇,
為求成功率大啲,
買左舊靚肉黎整...
全程一路整一路留意,
終於成品不錯喔 ^O^

好味,肉好淋,加上我用蜜芽糖掃面再焗,
第一次就做到自己想要嘅效果...


今次唔夠焦,下次會焗耐啲燶啲香口啲...


收棍當日,試機整溫泉蛋,
又成功 XD


一句講哂,呢支棍好好玩,
冇買錯 ^^


好耐冇 update 呢樹喇,
懶到冇朋友...
早前同老闆去左紐西蘭 11 日,
希望自己有耐性執下啲相同大家分享下 :)





2016年11月14日 星期一

秋葵 ‧ my little garden


我同老闆都喜歡食秋葵,
年頭買左包種子諗住自家種,
點知冇左件事,
終於兩個幾月前醒起將種子落泥...

每日都望下佢地有冇生長,
日日望日日諗點解仲未有喜嘅?

終於前兩星期發現佢開花,
知道開花就會有結果...
真係架,朶花謝左就會出秋葵架 ...
(不過開花同花謝係好短時間,幾個鐘嘅事,所以 3 次都影唔到)


呢隻就係我地第一隻自家種秋葵喇 ^0^
超級開心呀,跟住同自己講,
得一隻,睇黎要切薄片,然後炒蛋,
珍而重之將佢成為一味餸菜 :D


呢隻係第 3 隻,好 bb (第 2 隻唔記得影 :p)


近鏡好多毛毛 (巧打意呀)


不過可能我地比佢個環境唔夠寛敞,
所以秋葵數量好少,
住新界村屋嘅朋友同我講佢嗰盆多到食唔切喎... @@

唔緊要,自家種,多與少,都好開心,食得放心 ^O^

2016年11月2日 星期三

咖啡抹茶三色戚風蛋糕


原來真係會嘅,
一係唔玩,一開始玩溝色就成日心思思想再玩...
自從上次個雙色後,
好想快啲再玩,終於今晚有飯局,
有哂藉口開壇啦...


今次呢... 係冇進步嘅,
依然咁矮小,啲窿多過上次,同大過上次 :p


雖然又係唔靚仔,
但佢始終有內在美,仲幾好味添 ^^

溝色戚風最好玩嘅地方,
就係落糊時好隨性,脫模時望到嘅花紋係會點...


嚴格黎講呢兩個溝色戚風嘅外型我唔係太接受,
但好 enjoy 過程,真係幾好玩架 :)


今晚係好友 m 小姐生日飯局,
因同主角太熟,所以直情問佢飯後想吃咩甜品,
呢幾隻味道係佢落嘅 order,
佢仲話唔好搞咁多野,唔使刎 cream,要原汁原味...
就咁,呢個就成為佢今晚嘅生日蛋糕喇 
(不過比我切開左研究左先 lu :p)

m, happy birthday to you ah xx


我呢兩個溝色戚風,响焗爐裡嘅進展係不錯嘅,
正常地扒高,但最後幾分鐘,突然會回縮...
請問,我邊 part 做錯左?
(單色我未試過有咁嘅情況的) 


2016年10月22日 星期六

抹茶雙色戚風蛋糕


一直唔敢玩雙色戚風,點解??
因實在太了解自己喇,
冇耐性、怕煩、粗手粗腳...

點知今朝起身,
腦袋第一個彈出黎想做嘅事,
竟然係雙色戚風 @@
好,就挑戰下自己...

想成品顏色有大啲對比,
選擇左做原味同抹茶 
(係偏心嘅,我係抹茶控麻 ^^)


蛋糕糊入模時聽人講話好隨意就得架喇,
但出到黎隨意到有啲得少少 :p


睇下...


同埋...
分開左兩個蛋糕糊,
唔知點解成件事好似繁複左好多咁...
fold in 時又粗魯左,
搞到個蛋糕又矮,又鬼死咁多窿窿 > <"


我問老闆 :何解我咁鬼粗魯,溫柔啲得冇?
佢答:下? 全球華人都知你唔溫柔過喎...
我 : 哦... 唔該哂... 好有鼓勵性囉 @@

2016年10月19日 星期三

原味綿花蛋糕


今個週末唔知邊樹黎嘅衝動,
喱响廚房一而再,再而三咁焗綿花蛋糕
唔係因為我精益求精,而係因為失敗再失敗... @@

第一個升得唔夠高,
第二個升得夠但放涼後個面皺到不堪入目 > <
呢個係第三個,但都唔係靚...




每焗一次,都要調較個爐溫,
終於比我較到個叫做適合焗綿花蛋糕嘅溫度

我個爐火氣猛,需放冰粒落水,水浴法
先用 150度 20分鐘至面上色,
再用 130 度 焗 60分鐘至熟為止


雖然個樣唔夠靚,
但其實佢真係好好味,好幼細,我 like


老闆食後表示都係 like 戚風多啲,
呵呵,我當然唔介意啦,
焗戚風爐火易掌握啲,又快搞掂 ^^

但我真係好想自己焗嘅綿花好似 allie 嗰個咁靚就好 lu...


2016年10月1日 星期六

紙包蛋糕



好耐冇同個焗爐傾計,
今日挑起條筋好想食最原始嘅紙包蛋糕...



仍然係我最喜愛嘅,簡簡單單的,
由細到大,從未變過 ^^




2016年9月15日 星期四

中秋節快樂 + happy birthday to me


今年生日咁啱係中秋佳節,
因為懶所以無開壇整月餅,
因手上實在有唔少現貨,
全部都係人家送的...

今個星期初已經同自己講放自己幾日假,
唔做瑜伽,唔跟日常嘅行程,
諗到咩就做咩 ^^

前兩日去左轉花墟,
一心諗住買啲鮮花番屋企插,
等自己開心下麻...


小學雞作品


朋友送嘅生日禮物,
初初打開真係唔知係咩...


原來佢係一個 "月亮" 來的 ^O^
回家後同老闆熄哂燈,
着左佢黎影相,好似呀,
佢仲有埋啲月球表面嘅效果,
我好鐘意呀 XD


白燈外,仲有黃燈...
以後想睇月光由自己話事,
以前成日聽啲女仔講 : 我要天上嘅月光,
原來真係可以架 ^^

好多謝朋友嘅心意,
佢知我實在太喜歡望天,望星,望月光 :p


今晚番娘家做節,
生日可以同爸媽,屋企人一齊過,
真好!

响樹,祝大家中秋節快樂呀 ^O^








2016年8月28日 星期日

lemon balm ‧ my little garden


屋企盤 "檸檬香草" 係舊年由種子種起,
估唔到佢嘅生長能力奇高,
最近佢直情係有啲唔受控制添 :p

有見及此,今日把心一橫,
將佢大部份剪下黎送比朋友,
沖水、調酒、打汁、烹煮亦可...



佢地唔係一支一支,而係成棵上...


每次同佢地換泥,或修剪,
佢地都會令到成間屋充滿檸檬香味,
大愛 ^^


呢堆自家種香草,
希望朋友喜歡 :)

2016年8月10日 星期三

舊鞋子


早前無意中响面書發現 "舊鞋救命 step 30" 呢個台灣機構,
其一使命係將舊鞋帶過去非洲,
給當地孩子能夠有一雙鞋子穿上,
可以幫助佢地抵抗致命嘅沙蚤,
好等佢地可以上學讀書,健康生活...
睇完後,腦裡一直記住...

剛過去嘅週末,
我同幾個愛吃嘅好友去左台北一轉,
响早幾個星期前我先聯絡呢間機構,
會否响我去台北嗰幾日有收舊鞋嘅活動安排,
幸運地7號那天响大直區就有一個,
然後打開鞋柜看看有邊啲唔會再着,
清洗,曬乾,處理得乾乾淨淨,
再然後就跟住我去台灣 lu...


當天嘅情況,簡簡單單的,
但現場都有不少人捐出一袋袋嘅舊鞋,
工作人員亦小心地去檢查鞋子適合與否...




小小心意



有興趣可望望 "舊鞋救命 step 30" 嘅網頁


朋友話香港都有收舊鞋嘅機構,
可能我冇留意到啦...
不過,只要鞋子捐出而真的有人受惠,
那裡都可以 :)


2016年8月5日 星期五

happy birthday to my hubby


今日老闆生日,
做左個佢喜歡嘅橙皮漬戚風比佢食...

話哂都叫做生日蛋糕吖,
所以打左啲 cream 刎刎佢,
再攞啲唔關事嘅 rosemary 黎裝飾下 (我愛綠色吖麻 :p)
搞掂 ^O^


祝老闆生日快樂,身體健康 xx


2016年7月31日 星期日

一切安好


跟進嘅身體報告出了,
沒有壞嘅方向... (感恩)

問題當然係有嘅,
但已經算係微不足道了,
冇藥可食,唯有靠自己免疫力對抗...

我要加陪自己嘅傻大姐精神,
飲食再健康啲 (其實都好 ok 健康喇喎),
再多啲運動時間,
同埋,多啲蒸蒸焗焗,
放鬆自己嘅天生緊張大師性格至為重要 ^^



家中嘅植物得老闆細心照料,
大家都翠綠,強壯同茂盛 :)


今次呢件小風波害得身邊人,少數老死擔心了一場,
所以呢個結果對佢地都係一個最好嘅回禮了...

响樹亦都多謝咁多位 blog 友仔你地嘅留言同祝福,
我地雖素未謀面,
但你地嘅關懷我真心感受到,
好感動...
多謝妳.....地呀! 



2016年7月26日 星期二

小魔怪夏令營


未放暑假前,
已經同家中兩隻小魔怪講姑姐同姑媽會响暑假同佢地住酒店,
等佢地可以儘情地游下水,開心下 ^^

啱啱過嘅星期日入住,
大學站嘅 hyatt hotel, 2 晚,我 1 打 2,
一個係我哥哥嘅仔仔,
另一個係我細佬嘅女女,
所以今次姑姐又姑媽,
忙到不亦樂乎 :)


睇佢地真係嘆到喱...
而我就全程好似救生員咁,
對眼未離開過泳池 :p


環境真真不錯 ^^


房間外嘅景色,雖然唔係對住吐露港,
但綠草如茵都係我喜歡嘅 ^^


與其話我陪佢地兩個玩,
實際啱啱相反,有佢兩個嘈嘈閉,
雖然好攰,但好開心 :)

2016年7月23日 星期六

雜莓芝士凍撻


足足有個幾月冇 update 呢樹...

今晚姐夫下廚,
家姐想我整啲飯後甜品,
仲指明想食芝士凍撻,
都好吖,我想跟 allie 個食譜好耐,
終於可以開壇喇 :)


希望佢地鐘意 ^^


剛出嘅身體報告出了小亂子,
呢幾星期整個人好唔踏實...
冇玩烘焙,不過好彩仲識煮飯比老闆 :p
見佢比我更擔心,肉赤 > <

只希望下星期嘅跟進報告會有好消息啦..啦...啦 ^O^

2016年6月10日 星期五

小餐包


好耐冇 update 呢樹喇,
早前外遊左幾日,
跟住啲舊上司,老友們排住隊咁番黎香港,
總之就無事忙啦...

今日終於有一整日可以入廚房搞下野,
好想焗盤麵包做早餐,
老闆話想食餐包,
真好,我嘅最愛 ^^


好鐘意咁望佢地


呢排見唔少人整卷包,
未又學人留啲麵糰黎玩下,
點知... @@


係,賬卜卜超可愛,
但點睇都唔覺佢有卷過囉,
但...我真係有卷到架麻 > <"


最近的起心肝再次玩番瑜伽,
以前總係提唔起興趣,
運動寧願選擇打波、行山...
但人越大,筋腱就越緊,
為左自己為左屋企人,
決心再試試愛上佢...

不過唔知係咪我心理作用,
開始左幾堂,冇以前咁抗拒,
而且呢兩星期我睡眠質素好左好多,
總算有正面嘅效果吖,
繼續努力 ^O^

2016年5月6日 星期五

香橙西柚果醬


話說好耐好耐冇整麵包,
噚日終於的起心肝起壇開工,
見 v 仔 panini 模入左後宮一段時間,
決定整條吐司黎寵幸一下佢 :)

太耐冇整包生手左,
個外型實在唔想影底,
好在都食得落肚... @@

整完包後,再準備整樽果醬比老闆品嚐,
之前整過剩橙肉嘅果醬,
今次搞搞新意思...
用左 4個大橙,1個西柚,
當中起左2個橙皮同半個西柚皮,
連埋啲果肉果汁一齊煮


好多果肉,又有果皮嘅少少苦味,
原來加埋果皮嘅味道又好 ok 喎,
今次呢樽果醬我自己好滿意,真真好好味,
老闆都好鐘意 ^O^


今日嘅早餐,用 v 仔夾一夾塊包,
好快已經做到外脆內軟,
效果好過多士爐,配好好味果醬,再加杯啡,讚!