2013年7月31日 星期三

紅茶雪芳蛋糕

呢排沉迷整雪芳蛋糕,
因身邊唔少人都鐘意食,
但就一直都搵唔到一個 17cm 嘅鋁模,
市面嘅唔係 size 唔啱,就係唔夠高身...

想喺日本訂購番黎,但基於種種原因又唔成事,
就連發夢都係 17cm 嘅鋁模...
終於, 我呢個唔淘寶嘅人,開始左我人生第一個買賣,
最初頗為擔心品質問題,但主人話淘佢番黎如果係正貨嘅話就當然好,
但相反嘅都起碼試過吖,費事我成日發夢都諗住佢喎...

終於,終於... 個模到手喇,講真品質確係唔錯,
蛋糕糊爬得好好,又易清洗,
我終於做到一個開到花嘅雪芳蛋糕喇...


今次我加左响 "富澤商店" 買嘅 "紅茶粉",
好香濃茶味,我本人就好鐘意喇








好開心呀 

2013年7月26日 星期五

士多啤梨忌廉蛋糕

今晚同奶奶一家人食飯,
大姑奶同外甥女嘅生日飯...

上次佢地食過我整嘅雪芳蛋糕,好鐘意,
但冇理由就咁整個雪芳比佢地切架,
所以今次膽粗粗學人整個忌廉蛋糕過佢地...


my first cream cake  ~ 士多啤梨忌廉蛋糕



原味雪芳蛋糕做底,外面刎忌廉,
好彩近年餅店啲忌廉蛋糕都唔係一定要刎得好平滑,
我就懶係學人咁 "隨意" (其實就係刎得唔平咁囉)



希望佢地鐘意啦啦啦 

2013年7月23日 星期二

香蒜蘑菇螺絲粉


今日 green monday,
清清地炒左個意粉做晚餐,
但所謂清清地,
當中材料有:蒜片啦,蘑菇啦,蕃茄乾啦同三色椒啦,
視覺同味覺都唔錯呢




最緊要主人話好味

2013年7月22日 星期一

cream brulee



焦糖燉蛋係主人喜愛嘅甜品,
早前見 c chan 整左,
我見主人出差成個禮拜咁可憐,
琴晚整定等佢返黎有得食

個食譜好正,唔甜,唔漏,啲蛋又滑
但就係我支火槍唔生性,
整唔到靚靚嘅焦糖面






易整又好好味,主人好鐘意呢

多謝 c chan 嘅
食譜

2013年7月21日 星期日

檸檬薏米水


呢排成日落雨,濕濕漉漉咁,超唔舒服,
前幾日朋友問我係咪肥左,嘩,仲得了嘅,上磅見冇重到喎
但個人望落去就脹左啲咁囉...

即刻上網搵去水腫食療,見到呢個薏米水,今朝買齊料開工



味道好好呀
希望快啲走緊啲水腫啦
我跟呢個
食譜 架 

2013年7月18日 星期四

朱古力雪芳蛋糕

今日又想再練下整雪芳蛋糕,
白老鼠家庭話今次想試古古力味,
當然冇問題啦...
因如果冇家姐全家肯接收我嘅作品,
得我同主人一定 "啃" 唔哂囉...


出爐啦,涼透後切開見到唔少嶐嶐,
點解我嘅 fold in 咁水皮架




本書話,製作出狀態良好麵糊的秘訣在於:
"混拌時間短,攪拌次數少"

~ 呢兩句真係夠我慢慢研究...

同埋,我只得一個 20cm 嘅模,
但我又唔想整呢個 size 嘅份量 (怕出事可以浪費少啲野吖麻)
所以我用左 17cm 嘅份量整,
唔知係咪咁,個蛋糕冇爬得咁高

我係咪要入多個 17cm 嘅模呢?

2013年7月16日 星期二

是日晚餐

主人聽日出 trip,
將會有大量應酬等緊佢 (佢已經扁哂咀)

今晚特意煮啲佢最鍾意食嘅餸比佢開心吓


肉碎蒸豆腐 ~
今次我加左啲炸菜同指天椒,超惹味,送飯一流


上湯浸勝瓜 ~
我又加左佢鍾意嘅豆腐卜,
同好友送嘅白木耳 (我都係喜歡黑木耳多啲)




2 人,2 個餸,3 碗飯,清哂,正!

2013年7月15日 星期一

辣酒煮花螺

琴日班好友上黎我屋企話慶祝我考到車牌喎,
除充足酒水外,食物又係老規矩啦,一家整一啲

而我今次整嘅係 "辣酒煮花螺",
我係跟 blog 友仔
yanomi 本新書 "我家也是大牌檔" 嘅食譜,
平時我煮飯冇頭緒時就會去佢度搵靈感,
好鍾意佢整嘅野食,今次佢出左呢本書,而裡面嘅餸菜都係我鍾意嘅,
所以就買左佢番屋企私有化 lu...





評語係,好味,螺同蘿蔔都入哂味,但就係唔夠辣,
其實我已經私下加左隻指天椒架喇 ...

你班友仔,睇黎下次要加多兩隻至得 

2013年7月13日 星期六

我得左喇

今日好開心呀,
我幸運地一 take 過考到車牌



我終於可以放下 "心頭大石",繼續去開心每一天,
 無信仰嘅我,仍是感恩,惜福

另外,好友們,你們的著緊不比我少,我真心覺得幸福... i love u guys

2013年7月12日 星期五

原味雪芳蛋糕

為左克服做 "焗蛋糕" 嘅 "恐懼",
琴日去買左 blog 友仔介紹嘅一本書 ~
自己作職人配方の戚風蛋糕返屋企繼續努力...

睇完本書後,我終於知道自己最大嘅問題就係 "蛋白霜",
原來我一直都打得唔夠企身,所以 "撐" 唔起,
加上自己 fold in 又未掌握得到好好...

今日唔忿氣又黎過,
聽 
tabitachi 講做熟左原味先,
終於,今日嘅作品,好開心呀









會再試多幾次,希望個蛋糕會升得高啲,
我終於做到一個正常嘅 "焗蛋糕" 喇 

2013年7月7日 星期日

我的夢想國。瑞士 (8)

嚟到瑞士之旅最後一日喇
真係好... 好... 好唔捨得呀

今朝早起身走出露台爭取時間去感受寧靜嘅清晨,大自然嘅美妙






今日我地夜機返香港,所以今日嘅行程並唔趕急,
經全部團友同意,大家都想喺咁好嘅環境下享用一個長一點時間嘅早餐



早餐過後,出發去 [郵票小國] "列支敦斯登 liechtenstein" 遊覽,
"列支敦斯登" 係歐洲中部嘅內陸小國,亦係全世界最小的雙重內陸國家,
我地買左啲靚靚郵票做紀念 

 




跟住就去 "聖加倫 st. gallen" 參觀大教堂







教堂外草地,當地人相當悠閒



之後享用午餐,午餐過後再逛逛市內





最後要出發去 "蘇黎世",
到達後有足夠時間比我地市內觀光同購物,
而我地特登留呢個時段去掃朱古力做手信 (瑞士朱古力又真係幾好味  )

係時候去機場,真係要同瑞士講 bye bye lu


感想:
瑞士呢個地方真真美得令人發呆,
天藍,水清,草綠,
呢幾日我地去過或經過唔少雪山,湖泊,知名或不知名,
都可以靚到好似一幅畫咁...
而我.... 最最最欣賞嘅係,當地人對大自然嘅尊重,
無論動物,或一草一木

( 完 )

2013年7月4日 星期四

白神吐司




終於...
今日終於用白神酵母整包包...

傳說中嘅白神發酵力強勁,
今日終於體會到,
第一次發酵唔使 1 個鐘
已經有一倍咁大,勁呀,慳唔少時間呀


不過,今次個作品嘅型狀唔靚,包身顏色又唔夠...
 太多野有待改進喇




組織卻不錯...



點解會咁矮仔嘅呢

2013年7月3日 星期三

我的夢想國。瑞士 (7)

第 7 日喇,寫遊記都覺得唔捨得,
仲何況當時身處其中...

當知道有 blog 友仔追睇緊,
自己好似上左電咁揀啲靚相同大家分享
* * * * * * * * * * * * * * * * * * * * * * * *


好,呢日行程會係我鍾情嘅湖光山色
一大清早,5 點幾,已有醒意,
走出露台望下個天,感受吓大自然嘅美妙...


趁未到早餐時間,出去酒店外附近做做晨運...

一切都好寧靜






晨運後,返酒店食過早餐,開始今日嘅旅程...

首站係 "錫爾斯湖 lake sils",
旅遊巴士未停定時,成班人都呼叫起黎,
呢度真係好靚呀





踫啱牛牛出黎行街街,我地大家互 "啤"



湖邊有唔少當地人垂釣、划艇,散步... 好寫意...



好靚 ...



真係好好靚 ...



响 "錫爾斯湖" 停留左成個鐘,影左好多好多相,大滿足

跟住去坐馬車遊覽 "羅莎河谷 roseg valley",
"羅莎河谷" 係一個自然環境保護區




呢度啲牛牛好幸福







午餐於 "羅莎河谷" 內一餐廳,望住呢個景食飯,樂!



食過午飯後,起程返 "聖莫里茲" 行街街,
就喺嗰樹主人買左樣禮物送比我,多謝哂

行完街街再影下周圍,瑞士就係咁,周圍都係咁靚...






集合後要向今晚嘅酒店所在地 "弗利姆斯 films" 出發...

到達酒店後,本來我地係住酒店另一幢 building,
唔知點解,我地全團被安排住佢地嘅主樓 (維多利亞式設計),
房間高級左,代遇又高級啲,
呢度就係我房間露台望出去嘅景色呢




行程仲有一日咋,好唔捨得呀

( 續 )