2015年3月24日 星期二

紅菜頭湯


早兩日見 blogger C Chan 用紅菜頭打汁飲,
激起左我要會一會紅菜頭嘅衝動...

噚日走去街市買左一個煲湯,
配搭粟米、紅蘿蔔、仲有南瓜...
菜檔姐姐叫我紅菜頭嘅莖同葉都可以一齊放,
加一舊豬肉煲...


啖湯好香甜呀 ^o^


最緊要係紅菜頭好處多羅羅,
既係婦女嘅補血佳品,
其纖維又能促進腸蠕動,
有助身體排素,
仲有好好嘅防癌作用等等......

咁仲唔正???



2015年3月20日 星期五

英式鹹鬆餅


整完老闆愛嘅戚風,
我又整番樣自已好喜愛食嘅 "英式鹹鬆餅" ^o^

呢款鬆餅自從 kfc 冇做之後,
好難從街外買,
買到嘅全部都係帶甜味,唔鐘意!

好耐冇整喇 (實在太重牛油了 :p),
今次整一堆放雪櫃慢慢食, 
(希望佢同麵包一樣,放冰箱可保存耐點)...


細細件,罪惡感冇咁大 ^^"


為左佢地,買多包士多啤梨整果醬,
食時加埋 clotted cream,
冇得輸!


第一次買日本士多啤梨整果醬,
用番平時嘅食譜,
好甜囉 > <"
煮時係咁加檸檬汁去補救,
叫做好番啲...
下次整果醬唔再買靚靚日本貨喇 ...


柚子戚風蛋糕


天氣好,心情自然好 ^^

今早起身見到久違嘅陽光,
成個人精神哂 (實在太討厭濕濕 lup lup 嘅感覺啦)...

陪老闆食早餐時問佢想食麵包定蛋糕,
佢指明要戚風,
因為好鐘意戚風嘅口感喎...


好啦好啦,
知佢喜歡帶有清新口味,
今次加左柚子蜜 :)

   
可能加得唔夠,柚子味道唔係太出 ...


 下次再試過!



父母有事,做子女嘅一定會心痛,
相反的,我深信都會一樣...



2015年3月17日 星期二

媽媽,生日快樂


剛過去嘅星期天媽媽生日,
一家人齊齊整整、熱熱鬧鬧地過...

媽媽唔食芝士,
我唯有整忌廉蛋糕,
今次刎 cream 大膽左很多,仲學埋人唧花添 = ="
結果係... 啲邊一忽忽之外,
最後竟然唔夠 cream,
搞到個 cake 邊古古怪怪咁... 真搞鬼 XD

媽媽,
再次祝你生日快樂、
日日都開開心心,
最緊要身體健康呀 )))




前日熱鬧過後,
噚日朝爸爸打比我,
話條腰好痛,應該係剛拖地時整親 > <"

即刻飛的陪佢睇醫生,
陪佢一整天,見佢食完藥面色好番啲才安心啲...

今早起身打比佢問佢情況,
佢仲精精神神話好番好多啦啦啦,
點知中午過後突然嘔吐大作 :(

當下又即刻飛過去同佢去醫院,
好彩醫生話應該係噚日啲藥太過強勁,
爸爸受不了而已,不是大問題 (呼!)...

6兄弟姐妹今晚全部集齊娘家,
見爸爸活動自如,胃口正常才放心離開...

爸、媽,要乖,緊記身體要健康喔!





2015年3月12日 星期四

my little garden


我喜歡栽種,
但屋企冇露台,
又怕惹蚊滋,
所以家裡都係以水種植物為主...

朋友舊年年尾剪了一小棵薄荷比我,
說好易種云云,就係咁,
屋企嘅小花園一小撮一小撮咁形成左...


小花園暫時都係以種香草為主


薄荷,暫時尚算健康,
希望唔好好似之前咁只長高唔長肉 = ="


另一角度 ^^


下層白盤係 basil,
由種子種起,
雖然唔太靚仔,但頗香的 :)


木架响日本買,好平 ^^
真好,可以令到小花園望落整齊了不少...

我每朝都同佢地講早晨,傾下計,
希望佢地快快樂樂,健健康康咁成長囉 :)



日本啲相唔知點解唔見左呀,
仲有 "食" 同 "買" 未寫呀 ><"
嗚嗚...

2015年3月7日 星期六

東京 ‧ 閒逛


近年日元跌,
加上日本又有唔少心儀嘅物品想買,
年初同老闆講好想去轉東京 "瘋狂" 購物...
跟住同佢好快咁度左個期,
年初八出發,出走 6 日,yeah!!!

開始 plan 行程時至發現原來我對東京係冇乜認識,
以往去日本都係選擇郊外,
或較靜嘅地方放空一下...

不過今次都唔例外,
一樣閒遊唔趕急, 6 日全東京市,
除左所謂 "瘋狂" 購物外,
我都安排左時間去少少 "景點" :)

呢日起身見咁好天氣,
即刻向 "新宿御苑" 出發!

lets go :)




明知唔係櫻花期,但苑內竟有幾棵樹開左花,
開心到我呢 ^^

不過真係唔識分係 櫻花,梅花,定桃花,
總之見到佢地就開心哂...











苑內好大,因唔係假期,
所以冇乜人,好正,好舒服,
單單响呢樹都過左半天,
靜思一下 ^^



另一晴天,
去左 "東京晴空塔",
雖同樣唔係假期,
但呢樹多人到不得了,
排隊上塔頂排左成個鐘,
老闆想上,我呢個畏高者唯有奉陪 ^^"


呢兩張係 30樓影嘅東京市



呢張係 400+ 幾米高嘅東京市貌,
雖然當時我對腳係有小震外,
其實風景真的很不錯呢 ^^"



下篇將會係 "食" 同 "買" XD