18天歐遊 ‧ 出發

舊年 9月，幾個女生柴娃娃咁講話去歐遊，

由決定，到執行李，

至聽晚出發共用了九個月時間籌備，

過程充滿甩漏，一點都不順利，

總之有笑，亦有淚 ...

今次嘅 18天瑞士、奧地利、匈牙利之旅，

盡是我喜愛嘅山區，湖泊，同小鎮...

超級期待！

從未試過離家這麼多天，

多謝家中老闆任何時候都支持我做任何事 ^^

伯爵茶戚風蛋糕

噚日一日都落雨，又黃又紅，

冇出街意慾，

就成日喱响廚房整整整，

全部都係老闆最愛嘅...

戚風蛋糕

士多啤梨果醬

小餐包

除左咖啡，

earl grey tea 都係我嘅至愛，

噚日就用佢黎整左個戚風

味道不錯喔，可以再香濃點 ^^

earl grey tea 我較喜歡呢隻牌子，

唔易搵，朋友响外地見到都會買比我，

所以屋企而家嘅存貨夠我有排飲呢 :p

happy birthday to g

又一個笨手笨腳之作 :p

好友 g 生日話想食忌廉蛋糕，

我同佢講我只可以肯定個蛋糕好食，

但唔肯定個蛋糕靚仔...

既然佢話唔介意，

咁我當然又盡力而為啦...啦......

早前趁熱鬧買左包櫻花漬，

諗住留作做凍餅裝飾...

咁見佢有响樹咪試下玩囉，

不過我都係覺得佢放液體散開會靚啲 :)

 honey g, happy birthday ah xx

上貨 ‧ 曼谷

話說，

我真係好鐘意去旅行，

長短程我都喜歡 ^^

上星期同一班女生結伴去曼谷 4 天，

主要都係食、買、揼...

而我再多一樣，

我喜歡早餐後留响泳池旁發呆，

至午餐至出動...

本來呢類短程好少會出網誌，

但今次實在買得太興奮了，

想响樹同大家分享一下 ^^

近年 shopping 系列已經唔再係衫褲鞋祙，

大多數已集中家品，用廚房用品，

今次亦不例外...

呢兩套碟，同刀叉好平，

又係我最喜歡嘅綠色，

直情冇考慮就搬左番香港

碟 - 約 HK$25

刀叉 - 每隻約 HK$9

blue elephant 醬料我已經有，

呢堆買黎送比朋友，

至於兩包米係買黎自己試下，

因每次去其他地方買當地嘅米已經成為我一小小習慣 :)

megachef 呢隻牌子嘅蠔油我食開，

今次補貨，再試埋佢支魚露，

聽講亦不錯的

網上有不少煮婦都讚米糠油健康，

見當地有咁多選擇，

決定會一會佢

椰子油係買黎做按摩，

首先喜歡佢淡淡嘅椰子香，

而最主要嘅係皮膚易吸收，易推又唔笠，

因我最怕痴笠笠嘅感覺...

the spice story 嘅各種香料，

相對起香港超市便宜好多 ^^

連荷葉都有，

感覺相比起香港街市嗰啲乾淨同完整得多 

粉絲我喜歡泰國粉絲，

唔易斷，又有咬口，

唔似香港嗰啲煮一陣已經爛哂...

醬包又係買比朋友最好嘅手信，

有哂說明，只要加上自己鐘意嘅材料就好快有得食 ^^

另外仲有其他粉麵，淋浴露等等...

呢次旅程咁啱對泰幣嘅滙率好不錯，

所以今次買得好開心，好盡興 ^O^

文藝 ‧ 台北

台北，

一個久不久會去嘅地方，

一個只需個多鐘機程嘅地方，

一個小休嘅理想地方...

以往都係同一班朋友前往，

主要都係飲飲食食...

上上星期，

無意中見到 CX 機票連稅唔使 1 千， 

好吸引呢...

跟手請示老闆 (因單拖一個)，得到批准後，

出票 book 房，4 日 3 夜，上星期三出發！

今次自己一個人自由自在咁周圍去，

行左唔少小店，

坐過唔少 cafe，

過足癮 ^^

响樹我唔詳細打遊記了，

揀出少少自己喜愛嘅地方 ~

"松山文創園區" 

呢度悠悠閒閒咁消磨左大半日，

園內嘅 "誠品生活松菸店"，

有唔少家居生活小品，

我愛死了 > <

剛巧週末有個市集，好好逛 :)

另一個喜歡嘅地方 "四四南村‧好丘"

位於 "台北 101" 附近，

一個繁華的鬧區中，卻保留一個寧靜小眷村...

村內有一餐廳 (聞說 bagel 好出名，但我太飽冇試)，

餐廳旁亦有販賣東西，食嘅用嘅都有...

好耐冇見呢隻玻璃窗 

每一日我都有留意天氣報告，

呢日氣象局話天晴喎，

好開心咁坐左成粒鐘捷運去 "淡水"，

諗住睇日落嘛...

點知... 眼前大霧到喱... @@

行左一陣，

唯有搵間 cafe 坐底 "欣賞" 冇日落嘅 "淡水" 囉 :p

呢間係我嘅小房間

有個小露台

小小浴室，一個人足夠了！

台灣人好熱情，

臨走時收到一份 (最後係兩份 ^^) 嘅小禮物，

多謝妳！老闆話味道不錯呢！

一個人去旅行好自由，

完完全全屬於自己嘅旅程，

除了吃方面單調點外...

有機會仍會再出發！

小甜點

今晚球隊月經 bbq 聚，

呢兩日歡天喜地咁整左一大堆甜點比佢地食...

點知因為某種原因，

我出席唔到...

對住面前咁多小甜點，

點算 ???

人與人之間真係好複雜，

活左咁多年，

我仍然係咩都放响塊面上 (冇鬼用 ><")，

與其黑住面、笑唔出，

倒不如唔出席...囉...

吃西多士的執着

可能係情意結...

細個嘅時候爸媽要出海為生，

每隔兩個月至回來一次賣魚獲及為魚船補給...

而每次回來稍作休息期間都會帶我地去食 "西餐"，

而西多士係必叫嘅一種，

可能由那時開始對西多士有了一份特別嘅情感...

但人大了，知道西多士嘅制作，

嚇怕了，不敢隨便吃...

喜歡食而又唔敢食，

嗰種無奈...

自從市面上有了氣炸鍋後，

一直都對佢存有懷疑...

功能上、外表上、需求上、存放上等等...

上個星期終於排除哂自己嘅疑慮帶左佢返屋企，

開光嘅係西多士，

一滴油都冇放，而又可以享用到，

真係好好好開心，

仲要係自己最愛嘅版本 "走醬食練奶" ^o^

配一杯洛神花茶，抵消嗰片牛油，

太好了 (自我安慰中)...XD