黑糖鴛鴦提子合桃麥包

係，又係呢款包...

事緣前兩日整左一轉比老闆同家姐一家，

當晚家姐就 whatsapp 話一定要 encore，

因為佢放工返到屋企已經所餘無幾，

姐夫同姨甥仔食左一大部份...

今次打左 400g 粉，

應該夠分喇卦... 

仲用唔同 size 黎比佢地區分添 :p

近鏡見到啲刀工真係不得了，

幾咁唔乾淨利落 @@"

不過每個都脹卜卜，愛！

今次用左 allie 介紹嘅大粒金提，

再加普通提子，

希望要求多多嘅家姐鐘意啦 :)

黑糖合桃提子麥包

呢幾日好似春天咁，細雨綿綿又潮濕... 

冬天係咪唔再黎喇?  >.<

老闆噚日同明天都北上出差 (因佢儘量都唔想過夜)...

今朝見佢瞓醒都呆呆地咁 :( 

睇到佢咁攰，

買齊料煲個 "粉葛牛大力土茯苓赤小豆扁豆湯"，

比佢消下啲攰氣，去下濕囉...

想再令佢開心啲，

又整左佢最愛嘅黑糖提子包，

今次加埋合桃，香口啲 :)

呢個爆哂餡嘅係比我家姐，

佢又係超愛提子，成日話要爆瀉嗰隻...

(究竟係食包定提子???)

唔知點解幾鐘意見到咁樣爆開嘅包面... :p

又一次讚個蒸爐，好快咁幫我將個麵糰發酵，

焗麵包時放個湯煲入去，

gum 制就搞掂，等飲湯 ^^

美式窩夫 ‧ v 仔

2016 第二日一早起身溝定個麵糊，

然後梳洗，煮咖啡，

之後時間啱啱好，

開機做個美式窩夫比老闆享用...

食完 plain 嘅後，

問佢有冇興趣食有芝士餡嘅，

佢當然話有啦 (其實佢知道我想試囉 :p)

打開雪櫃見有 parmesan cheese，

我不留情面地放了不少...

結果係咸咸香香咁，都幾好味道喎 ^O^

好魔鬼呀 )))))

2016 行大運

happy new year!

每年 1月1號 都會同老闆，好友一齊行個山，

感覺上行個大運咁囉 (好八卦 :p)

除非抱恙... 就好似舊年咁...:(

今年冇事好叻叻，

上個星期已經揀左行 "馬鞍山 ~ 大鐘山 ~ 西貢" 呢條路線 ^^

今日元旦日天氣好好，好啱行山，

yeah，出發！ 

由馬鞍山郊野公園開始 ~

一路上山，到左路程一半，

就見到大鐘山，

佢好高好斜的... 

呢樹有一片好大嘅平地，

唔上大鐘山嘅可响呢樹作個小休，好舒服...

今日見到唔少人响樹露營、或玩滑翔傘...

另一面係西貢市，可惜唔少煙霞...

咁啱剛巧有人需要飛行服務隊拯救，

第一次咁近距離望住成個拯救過程，

我深覺佢地好型！

我地响平地睇人玩呢樣玩嗰樣，

休息夠就落山去西貢市搵野食，

呢班酒鬼當然有叫番支香檳嘆下啦...

食下傾下又到晚飯時間，

我地冇比佢停呀，去左西貢碼頭買啲海鮮，

跟住去朋友屋企黎個蒸海鮮粥底鍋，

好滿足喔！

流心芝士撻 ‧ v 仔

近期 v 仔機大熱，熱愛食窩夫嘅我，

一直同自己講："唔關我事，唔關我事... 

我個窩夫機未壞... 係，雖然格仔唔夠深，成品唔夠靚仔................"

一路都相安無事嘅...

直至最近見到 blog 友 c chan 又展示 v 仔嘅威力 (簡稱放毒 :p)，

又再挑起我嘅注意...

老闆見我日日係咁睇人家嘅 v 仔作品，

問我做咩齋睇唔買?  

我話舊嘅未壞唔想浪費麻，

跟住佢即刻打比佢外娚問有冇興趣接收，

答案係： 超有 :D

哈，就係咁，嗰日就走左出去百x滙問幾時有貨，

知道要等到 1 月尾，都好啦，照落訂...

之後响 v 仔官網見到一間教煮食學校亦有呢個訂購，

八卦打去問幾時會有現貨，

點知答案係 12月尾喎，

見到咁，就打去百x匯問訂金可否改訂模具，

得到正面回覆後，再去學校訂購，等12月尾收貨啦...

我好記得訂貨嗰日係星期三，星期六就收到送貨通知，

前後唔使一星期就見到我嘅聖誕禮物，yeah... ^^

收機後正直聖誕，我用過佢黎整芝士撻、甜甜圈，

真係好方便，尤其係整撻皮，

以後我整乜撻物撻時唔使戰戰兢兢喇...

今日又整定一批芝士撻預備明晚飯後甜品 

(因屋企人試過焗完即刻食，亦試過放雪櫃一晚後，

佢地不約而同話鐘意雪一晚後嘅口感喎...)

都係嗰句啦，我啲成品外型係有待改善嘅 :p

跟機又有 allie 嘅食譜書，

呢個新玩具又有排玩喇 ^O^

過埋明天 2015 就完結，

2016 不求更精彩，只望身邊所有人都事事順意，身體健康！

喂喂，你地 (blog 友) 都有份架，

歡迎對號入座呀 ^^

新年快樂！

christmas wreath

一直都喜歡松樹嘅香氣，

但屋企唔大，總唔能夠買一棵真松樹返屋企擺...

早前响 fb 見到一網上花店有教整聖誕花環，

知道店主响用料上都係用靚貨，

同埋，最緊要係用真松枝，

所以就報左名上堂 lu...

我嘅成品呀，

我都幾滿意架 (唔知羞 ing ...)

今年有佢放响屋企，

視覺同嗅覺都好有聖誕 feel ^0^

店主話可以放到農曆年，

當然啲玫瑰會謝嘅，

如果唔鐘意可以到聖誕節買新鮮嘅番黎換左佢，

但我就係鐘意佢地謝左嘅顏色，

到時仲 vintage 啲添呀 ^^

一口芝士包

好耐冇整包喇，

呢排懶到喱...

噚晚突然有股力量開壇，

打左個麵糰放雪櫃發酵，

今朝瞓醒繼續餘下嘅動作...

不過真係太耐冇整，

過程好唔得心應手 > <

成品頗樣衰嘅 "一口芝士包"，

一啖一個，夠哂方便 ^^

好彩都好軟熟，算好味啦 :)

喂喂，精神，勤力番啲喇喂 )))))))