比利時窩夫 ‧ v 仔

自從有左 v 仔 後，早餐方便左好多，

食前一晚整定個麵糊，

第二日起身只係煮咖啡，開 v 仔就有得食，

快、靚、正...

對老闆黎講， 有得食之餘仲有得玩，

佢每次都係多多要求，

一 片加芝士，一片要 mixed cheese，

一片 plain 嘅，一片食練奶啦...

總之按佢當時嘅喜好黎落 order，

每次都唔同咁啦 :p

試左比利時窩夫，我還是喜歡美式，

輕盈啲，脆口啲 ^o^

car camping

上星期六日同波友去左個兩日一夜嘅 car camp

人生第二次露營，

上一次已經係中學時代了...

今次再提起興趣係因為可渣車去到營地，

免卻負重走路到營地嘅苦況，

諗起當年要攀山涉水 3 個鐘至去到營地，

今時今日實在係可免則免了 ...

當日天氣好麻麻，

天陰，有雨，氣溫相當清涼，

到營地後，我地幾個冇乜經驗嘅成年人手忙腳亂咁起營，

終於踫踫撞撞下 set 好自己嘅範圍...

跟住就煮下野食，傾下計，飲下酒咁囉...

對住片大草地，個腦自然就會放空，

時間過得好快...

入夜後，晚餐我地打左個海鮮邊爐，

材料都算豐富架

(三點蟹、蝴蝶蚌、花甲、肥牛、黑豚肉、丸類...)

最後加半杯米，變成了海鮮粥，

個胃暖哂個人冇咁凍，好滿足 :)

雖然半夜落左場大雨，但總算冇變落湯雞，

第二朝仲有雀鳥聲做鬧鐘，

簡單梳洗食埋早餐就慢慢收拾回程...

car camp 嘅好處就係咩都放哂响車裡，

唔會因為重而考慮帶與唔帶，

我地仲決定响春天前會再安排多一次，

希望到時天氣會好過今次啦 :p

cream cheese oreo cookies

近兩月家姐同事免費幫我頭髮染色做型，

我好想答謝佢，

但我又知佢本人煮野食好叻，

問家姐點算好...

家姐話："不如你整曲奇比佢對仔女吖，

佢一定會好開心嘅..."

曲奇，當然好啦... 

之後問左嗰對小朋友係 4 同 6 歲，

上網見到個 oreo 嘅曲奇，就即刻扑搥，

因我覺得 oreo 同小朋友係會好 friend 的... :p

嗱，就咁，我覺得成品係 ~ 

"我很醜，可是我很好味"

琴晚整定，包得靚靚，今早攞過去 ^o^

黑糖鴛鴦提子合桃麥包

係，又係呢款包...

事緣前兩日整左一轉比老闆同家姐一家，

當晚家姐就 whatsapp 話一定要 encore，

因為佢放工返到屋企已經所餘無幾，

姐夫同姨甥仔食左一大部份...

今次打左 400g 粉，

應該夠分喇卦... 

仲用唔同 size 黎比佢地區分添 :p

近鏡見到啲刀工真係不得了，

幾咁唔乾淨利落 @@"

不過每個都脹卜卜，愛！

今次用左 allie 介紹嘅大粒金提，

再加普通提子，

希望要求多多嘅家姐鐘意啦 :)

黑糖合桃提子麥包

呢幾日好似春天咁，細雨綿綿又潮濕... 

冬天係咪唔再黎喇?  >.<

老闆噚日同明天都北上出差 (因佢儘量都唔想過夜)...

今朝見佢瞓醒都呆呆地咁 :( 

睇到佢咁攰，

買齊料煲個 "粉葛牛大力土茯苓赤小豆扁豆湯"，

比佢消下啲攰氣，去下濕囉...

想再令佢開心啲，

又整左佢最愛嘅黑糖提子包，

今次加埋合桃，香口啲 :)

呢個爆哂餡嘅係比我家姐，

佢又係超愛提子，成日話要爆瀉嗰隻...

(究竟係食包定提子???)

唔知點解幾鐘意見到咁樣爆開嘅包面... :p

又一次讚個蒸爐，好快咁幫我將個麵糰發酵，

焗麵包時放個湯煲入去，

gum 制就搞掂，等飲湯 ^^

美式窩夫 ‧ v 仔

2016 第二日一早起身溝定個麵糊，

然後梳洗，煮咖啡，

之後時間啱啱好，

開機做個美式窩夫比老闆享用...

食完 plain 嘅後，

問佢有冇興趣食有芝士餡嘅，

佢當然話有啦 (其實佢知道我想試囉 :p)

打開雪櫃見有 parmesan cheese，

我不留情面地放了不少...

結果係咸咸香香咁，都幾好味道喎 ^O^

好魔鬼呀 )))))

2016 行大運

happy new year!

每年 1月1號 都會同老闆，好友一齊行個山，

感覺上行個大運咁囉 (好八卦 :p)

除非抱恙... 就好似舊年咁...:(

今年冇事好叻叻，

上個星期已經揀左行 "馬鞍山 ~ 大鐘山 ~ 西貢" 呢條路線 ^^

今日元旦日天氣好好，好啱行山，

yeah，出發！ 

由馬鞍山郊野公園開始 ~

一路上山，到左路程一半，

就見到大鐘山，

佢好高好斜的... 

呢樹有一片好大嘅平地，

唔上大鐘山嘅可响呢樹作個小休，好舒服...

今日見到唔少人响樹露營、或玩滑翔傘...

另一面係西貢市，可惜唔少煙霞...

咁啱剛巧有人需要飛行服務隊拯救，

第一次咁近距離望住成個拯救過程，

我深覺佢地好型！

我地响平地睇人玩呢樣玩嗰樣，

休息夠就落山去西貢市搵野食，

呢班酒鬼當然有叫番支香檳嘆下啦...

食下傾下又到晚飯時間，

我地冇比佢停呀，去左西貢碼頭買啲海鮮，

跟住去朋友屋企黎個蒸海鮮粥底鍋，

好滿足喔！