18天歐遊 ‧ 瑞士 (4)

Interlaken West ~ Jungfrau ~ Chur

一早起身睇山上天氣報告，

ok 呀，可以上山頂呀，

拿拿臨食個快早餐就攻頂喇 )))))

由西站上山頂要轉幾程交通公具，

好彩我地有 L小姐，今次所有公交都由佢負責，

我地幾個唔使帶腦好正囉...

開始上山喇...

沿路景色 (雖然都係差不多，但睇極都唔厭) ^^

上到呢個中轉站，落地換另一公交 

繼續上山...

黎到半山 "Eismeer" 喇，

呢樹可以落車比你影下相，

冇得行出外邊，

只係隔住玻璃影嘅...

見到個藍天已經心開了 ^^

終於，終於上到頂喇 ^^

真心，好開心上到黎，天氣算很不錯了...

雖然有時會白濛濛一片，

但好快又藍天白雲

好多朋友見到我啲相都話我好彩，

佢地去嘅時候大風大雪兼天氣差...

所以，雖然好凍，我地幾個响樹玩左好耐呢...

好靚...

玩到見肚餓，

回程到半山 "Grindelwald" 食個午餐...

對住呢個靚景食飯，寧舍好味道 :p

呢個 lunch 唔覺意食左好耐，

搞到落到山 miss 左班車，

即刻打比今晚嘅酒店希望佢地等埋我地至收工，

佢地話好啦，最遲等到 10點，

我地真係10點正到達，呼！

今晚轉陣地去 "Chur" 喇 ...

同 Interlaken 講 bye bye，

心足了！

18天歐遊 ‧ 瑞士 (3)

Interlaken West ~ Lauterbrunnen ~ Spiez ~ Interlaken West

呢日起身第一件事打聽下上唔上得山，

結果真係天氣麻麻地，

咁我地就話既然黎到，

上去山中間試下水溫先，

唔得嘅未走囉...

好，就咁決定，食個早餐就起程，

go go go !!!

火車上山途中...

繼續...

上到半山 Lauterbrunnen，

休息一陣，四圍行下，食個晏先

其實呢度都好靚，行下，影下，

都玩左個幾兩個鐘，

見到個山頂天氣都係麻麻，

決定唔搏喇...

落山

番到西站，見到有船遊湖，

時間仲差唔多航行添，就咁就跳上隻船度 lu...

買左 swiss pass 真係好鬼方便，

大部份瑞士交通公具都可乘搭，唔蝕吖麻 :p

開航喇...

靚...

好靚...

好鬼靚...

靚到喱...

整個遊湖有幾個 (定 10 幾個呢?) 碼頭可上岸，

任君選擇...

繼續...

沿途啲景色真係靚到爆燈...

我地決定响 Spiez 呢個站落船，

對住呢個景食少少野，

行番去火車站搭火車番去 Interlaken west

行去火車站嘅沿途風光，

我好鐘意 Spiez 呢個地方，

一路行，個心好平靜...

返酒店自煮個簡單晚餐，

天氣預測話聽日有機會好天呢，yeah！

18天歐遊 ‧ 瑞士 (2)

Genève ~ Montreux ~ Golden Pass ~ Interlaken

噚晚好好瞓，起身時好夠精神， 

今日行程去 Interlaken，

因前年去左 Zermatt，所以今次我重點要求上少女峰 ^^

呢日一早搭火車去 Montreux，再轉 golden pass 去 Interlaken，

買哂咖啡麵包，响火車上慢慢嘆 :)

响瑞士搭火車一啲都唔悶，因沿途風景好靚

(响火車車箱內影，所以唔係好反應到現場嘅美)

去到 Montreux 要轉 Golden Pass，

時間未到，推住行李周圍行下...

呢啲對住湖嘅酒店一定好貴... (我地心諗...)

去到 Interlaken West lu，

我地會响樹住兩晚，

萬一聽日天氣唔好上唔到山仲有後日麻...

到酒店都下晝 3，4點，放低行李後，

過去東站行下，嗰邊多啲商店，比較旺

東站呢邊多啲靚靚酒店，

韓國同印度嘅旅客反而佔大多數

行到傍晚 6，7點，去超市買左啲酒同小食，

食埋飯返酒店休息...

酒店露台外景色，西站比較寧靜 (我地較喜歡)

我地班酒鬼買左酒至知房間冇雪櫃，

咁就唯有放出窗外冰凍，

因出面氣溫都係處於 10 度以下呢 :p

希望聽日天氣會好，可以上山啦 (雖然天氣預測唔會好囉 >.<)

18天歐遊 ‧ 瑞士 (1)

歐遊返黎後都3個禮拜 lu，

一直無事忙，冇時間去認真咁揀啲相出黎...

今日，終於肯乖乖咁坐响電腦前，

開番個 folder，sort 番啲相，

一路睇，一路笑...

記得舊年自己生日會上，

朋友 L 宣布要去 Genève 做野，最少 3 年，

嘩，成班人起哄恭喜佢升職加薪啦 ^^

跟住我地就柴娃娃咁話，待佢安頓好，半年後會走啲 "水貨" 比佢，

辛辣麵、豆豉鯪魚、午餐肉等等走唔甩嘅，

之後嘅日子，4 個女生 (港女) 啲歐遊茶會總係開不停...

然後，11月中就買左機票，定左 18日，

主要頭嗰個星期留响 L Genève 嘅屋企調較時差，

同感受一下 Genève 嘅優質生活... 

跟住就向匈牙利同奧地利進發...

可惜，11月尾 L 很不好意思話 Genève 嘅調職要取消了，

佢身邊人身體出了毛病，要留港方便照料...

接着 K 嘅爸爸亦入了院...

雖然大家都好擔心，但仍樂觀去面對，

歐遊嘅事亦暫停安排...

今年年頭，K 爸爸離開左我地 :(

幸運地 L 身邊人康復過來...

直至到 3 月尾大家終於再坐底商討個行程，

最後，雖然 L 要早離團，而 K 要遲一個星期至可 join，

總算大家都可以齊齊整整咁玩吖 ^^

長氣完，睇相 (全程用手機影架咋) ^^"

第一日一早到 Genève ~

呢日住 bnb，呢樹係 bnb 外嘅景色

跟住魔鬼領隊 L 唔想我地黎緊幾日有 jet lag，

所以強迫我地出去市內觀光一整日...

因我前年黎過，所以呢日影好少相，

好唔容易到傍晚，食個快飯，即刻圓寂 XD

第二朝去 Interlaken 呀 ^^

a 貨 lady m "green tea mille crepe"

今晚家姐姐夫們，

一行 7 人上黎我樹食飯 (連我同老闆共 9 個 @@)，

為左呢個 "龐大飯聚"，

由諗菜單，預備，程序安排，

呢幾日個腦都係咁轉...

終於，8  餸 1 湯終於都順利完成 (呼！)

甜品方面，客人們尤其指明要凍吃，

見最近 lady m 咁熱鬧，

整番個 a 貨玩下先，

咁難得一班白老鼠唔介意幫我試味麻...

我呢個綠茶控，緊係整綠茶味架喇 ^^

外型有待改進

白老鼠食評，綠茶味可再濃一點 (收到！)

頭先洗碗時，

老闆話唔准再接呢啲 project，

佢話唔想再見到我每次飯聚都 "日思夜想" 喎 ...

(其實鬼叫你老婆我水皮咩，叻嘅點洗咁傷頭腦吖 XD)

特濃朱古力蛋糕 ‧ 7月1

歐遊相片處理中...

打個尖先，

今日係一年一度，七月一號，

好友 k 嘅媽媽嘅生日大日子，

我就梗係同以往一樣做個特濃朱古力蛋糕比佢今晚飯後切啦...

k 嘅爸爸今年年初離開左我地 :(

我地一班好友怕伯母唔慣，

相約今晚一齊熱熱鬧鬧同佢賀壽，

只希望佢老人家唔感到寂寞...

伯母好叻叻，

胃口好，心情又好，仲食左兩碗飯添，

之後見到個蛋糕又心心眼，

佢的確係一個不折不扣嘅朱古力狂迷 ^^

伯母，再次祝你生日快樂，

最緊要身體健康呀 :)